Qazaq ulttyq mýzyka akademııasynyń ataýy Qazaq ulttyq óner ýnıversıteti bolyp ózgerdi

Bul týraly búgin atalǵan oqý ordasynyń rektory Aıman Musaqojaeva jýrnalısterge bergen suhbatynda málim etti.

"Qazaq ulttyq mýzyka akademııasy ónerdiń barlyq janry men baǵyttaryn qamtıtyn ýnıversıtetke aınalady. Onda mýzykamen qatar horeografııa, ónertaný, beıneleý óneriniń túrleri, músin, dızaın, kıno, televıdenıe boıynsha mamandyqtar ashylatyn bolady", dedi ol.

Bilim oshaǵynyń perspektıvalary týraly baıandaı kele ol aǵymdaǵy jyly ýnıversıtet Beıbitshilik jáne kelisim, Táýelsizdik saraılarymen irgeles ornalasqan "Shabyt" ǵımaratyna qonys aýdaratyndyǵyn atap ótti. Sonymen qatar onyń aıtýynsha, aǵymdaǵy jyly stýdentter men professorlyq-oqytýshylyq quramǵa bilim oshaǵy jetken jetistikterdi ustap turýmen qatar ony odan ári joǵarylatý mindeti qoıylyp otyr.

"Búgingi tańda óner boıynsha bizdiń oqytatyn pánderimiz halyqaralyq aýqymda básekege túse alady. Sondaı-aq osy mamandyqtarda óte joǵary nátıjeler kórsetýdemiz. Bizdiń stýdentterimiz ben oqýshylarymyz únemi halyqaralyq festıvaldarda, baıqaýlarǵa qatysyp, júldeli oryndardy ıelenedi", dep atap ótti ýnıversıtet basshysy.

Onyń aıtýynsha, ýnıversıtettiń Eýrazııa sımfonııalyq orkestri Rım, Vena, Parıj jáne Máskeý qalalaryna eseptik kontsertpen saparlamaq. Onda olar Rımdegi Santa Chechılııa, Parıjdegi Gavo syndy tanymal kontsert zaldarynda óner kórsetedi. "Osyndaı álemdik deńgeıdegi zaldarda óz sheberligin kórsetý jáne Qazaqstan stýdentimiz dep maqtaný da mártebe", dedi A.Musaqojaeva.

Aıta keteıik, Qazaq ulttyq mýzyka akademııasy 1998 jyly naýryzdyń 31-inde Elbasy Nursultan Nazarbaevtyń qoldaýymen jáne bastamasymen qurylǵan bolatyn.