Qazaq ulttyq agrarlyq ýnıversıtetiniń túlekteri kezdesti
ALMATY. Maýsymnyń 18-i. QazAqparat /Erbol Turymbetov/ - Búgin Almatyda Qazaq ulttyq agrarlyq ýnıversıteti óz túlekteriniń kezdesý saltanatyn ótkizdi,
dep habarlaıdy QazAqparat.
Mereıli shara ýnıversıtettiń 80 jyldyǵy qarsańynda uıymdastyrylyp otyr. Oǵan Almaty qalasynyń ákimi Ahmetjan Esimov, oblys ákimi Serik Úmbetov pen basqa da elimizge belgili memleket jáne qoǵam qaıratkerleri qatysty.
«Bizdiń ýnıversıtet jyl saıyn agroónerkásip salasynda bilikti mamandar daıarlap keledi. Ýnıversıtetimiz elimizge jańalyq retinde enip jatqan agrarlyq qatynastardy qalyptastyrýdyń keshendi máselelerin túbegeıli sheshý mindetimen aınalysyp keledi. Bıyl Qazaq ulttyq agrarlyq ýnıversıtetine 80 jyl tolyp otyr. Sizderdi osy úlken mereıtoıda bas qosýlaryńyzben shyn júrekten quttyqtaımyn», dedi ýnıversıtet rektory Tilektes Espolov.
QazUAÝ Qazaqstandaǵy baıyrǵy Almaty zootehnıkalyq-maldárigerlik jáne Qazaq aýylsharýashylyq ınstıtýttarynyń birigýi negizinde 1996 jyly qurylǵan bolatyn. 2001 jylǵy 5-shi shildede Elbasymyz N. Nazarbaevtyń Jarlyǵymen Ulttyq ýnıversıtet mártebesine ıe boldy. Qazir ýnıversıtette 7 fakýltet, 39 kafedra bar. Onda elimizge tanymal 610 ǵylym doktorlary men kandıdattary jumys isteıdi.
«Men osy ýnıversıtette 1969-1974 jyldary veterınar-dáriger mamandyǵy boıynsha oqyǵan túlegimin. Ol kezde Almaty zootehnıkalyq-maldárigerlik ınstıtýty dep atalatyn edi. Búgingi joǵary deńgeıde uıymdastyrylǵan bul merekege óte qýanyshtymyn. Bári de ystyq, stýdent shaǵymyz qaıta eske túsip jatyr. Munan keıin de ýnıversıtetimiz damı bersin, elimizge jaqsy kadrlar daıarlaı bersin dep tileımin», deıdi osy toıǵa arnaıy kelgen Ońtústik Qazaqstan olystyq veterınarııalyq zerthanasynyń dırektory Qambarbek Ótemisov.
Shara barysynda túlekter men oqytýshylardyń, stýdentterdiń jáne QR Qorǵanys mınıstrliginen «Eń úzdik kafedra» ataǵyn alǵan áskerı kafedranyń ofıtserleri men kýrsanttarynyń saltanatty sherýi boldy. Sonymen qatar ýnıversıtettiń 500 stýdenti ulttyq «Qara jorǵa» bıin bıledi. 9 myń adam qatysqan bul mereke Eskendir men Birjan Hasanǵalıevter, Naǵıma Esqalıeva jáne basqa tanymal ánshilerdiń shoý-kontsertimen aıaqtaldy.
