Qazaq ulttyq agrarlyq ýnıversıtetiniń qandaı múlki zańsyz satylyp ketken

ASTANA. QazAqparat - Qazaq ulttyq agrarlyq zertteý ýnıversıteti múlkiniń «tý-talaqaıyn» shyǵarǵan. Bul jaıynda Bas prokýror Berik Asylovtyń atyna saýal joldaǵan Májilis depýtaty Erlan Saırov aıtty, dep habarlaıdy QazAqparat tilshisi.

«AMANAT» partııasy elimizdegi zańsyz ıemdelgen aktıvterdi qaıtarý máselesine erekshe nazar aýdarady. Qazaq ulttyq agrarlyq zertteý ýnıversıtetiniń bir top oqytýshy-ǵalymy Májilis depýtattaryna ýnıversıtetten zańsyz shyqqan aktıvterdi oqý ornyna qaıtarý týraly ótinish jasady.

Ýnıversıtet ujymy basqa menshik ıelerine zańsyz ótken aktıvter tizimimen tanystyrdy: 2001-2022 jyldary 3 stýdenttik jataqhana (1000 tósek-oryndyq), 5 oqý-zerthanalyq korpýs (18828,5 sharshy metr) ákimshilik-sharýashylyq ǵımarattar jáne ózge de jyljymaıtyn múlik obektileri (700 sharshy metr), ýnıversıtet ǵımarattaryna irgeles jer ýchaskeleri (shamamen 5 gektar), Almaty oblysynyń Talǵar jáne Eńbekshiqazaq aýdandarynda ornalasqan ýnıversıtettiń oqý-tájirıbelik sharýashylyǵyndaǵy jer ýchaskeleri (12 gektar) qoldy bolyp ketken. Qazaqtyń jalpaq tilimen aıtsaq, ýnıversıtet múlkiniń «tý-talaqaıyn» shyǵarǵan», - dedi depýtat Májilistiń jalpy otyrysynda.

Onyń atap ótýinshe, atalǵan nysandardy ıelengen zańdy tulǵalar oqý korpýstarynyń aýmaǵynda turǵyn úı keshenderin salǵan. Jataqhanalardy qonaq úı etip qaıta jabdyqtaǵan. karaoke, basqa da oıyn saýyq oryndaryn ashqan. Keıbir oqý korpýstaryn bıznes-ortalyqtarǵa aınaldyrǵan.

«Osy faktiler qanshama jastar men oqytýshylardy basyna otyryp, jetkinshek urpaqtyń moraldyq-rýhanı álemine oısyrata jasalǵan soqqy, ádilettilik prıntsıpterin taptaý bolyp sanalady. Ýnıversıtet ujymy aktıvterdi satý nemese olardy senimgerlik basqarýǵa berý týraly barlyq sheshimder rektor T.I.Espolovtyń tusynda qabyldanǵanyn jetkizip otyr. Bas prokýratýra elimizde zańdylyqty baqylap otyratyn organ retinde mynadaı qadamdar jasaýǵa: zańsyz qoldy bolǵan aktıvterdi qaıtarý komıssııasy aıasynda atalǵan ǵımarattardyń memleket menshigine qaıtarylýyn jedel qamtamasyz etýge; 2001-2022 jyldary osyndaı zańdy belshesinen basyp, baryp turǵan bassyzdyqqa barǵan sheneýikterdiń zań aldynda jaýapkershiligin anyqtaýǵa; elimizdegi basqa da joǵarǵy oqý oryndarynyń menshikti zańsyz berý máselesine aýdıt júrgizýge tıis dep sanaımyz», - dedi Erlan Saırov.