Qazaq ulttyq óner ýnıversıtetine resmı túrde Kúlásh Baıseıitovanyń esimi berildi

ASTANA. KAZINFORM – Qazaq ulttyq óner ýnıversıtetine resmı túrde ańyzǵa aınalǵan opera ánshisi Kúlásh Baıseıitovanyń esimi berildi. Bul týraly Mádenıet jáne aqparat mınıstrligi habarlady.

Eske sala keteıik, oqý ornyn qaıta ataý týraly sheshimdi Qazaqstan Respýblıkasynyń Prezıdenti Qasym-Jomart Toqaev qabyldap, bul týraly ótken jyly mádenıet jáne óner qyzmetkerlerin marapattaý rásiminde jarııalaǵan bolatyn.

Memlekettik qaıta tirkeý rásimi aıaqtalǵannan keıin, oqý ornyna «Kúlásh Baıseıitova atyndaǵy Qazaq ulttyq óner ýnıversıteti» ataýy resmı túrde berildi.

Bul mańyzdy oqıǵa Kúlásh Baıseıitovanyń ulttyq mádenıet pen qazaq ónerine qosqan zor úlesin aıshyqtap, onyń mol murasyn jas urpaqqa dáripteýdiń aıqyn kórinisi boldy.

Sonymen qatar «Astana Opera» teatrynyń Kameralyq zalyna Kúlásh Baıseıitovanyń esimi beriledi.