Qazaq ulttyq óner ýnıversıtetine Kúlásh Baıseıitovanyń esimi beriledi

ASTANA. KAZINFORM – Astanadaǵy Qazaq ulttyq óner ýnıversıtetine Kúlásh Baıseıitovanyń esimi beriledi. Bul týraly búgin Aqordada mádenıet jáne óner qyzmetkerlerin kásibı merekelerimen quttyqtaǵan Memleket basshysy Qasym-Jomart Toqaev aıtty.

«Meniń tapsyrammen Halyq ártisi jáne Halyq jazýshysy ataǵy qaıta berile bastady. Qazaqta „Ónerliniń órisi keń“ degen sóz bar. Halqymyz daryndy ul-qyzdaryn qashanda qadirleı bilgen. Osy oraıda sizderge taǵy bir jaqsy jańalyq aıtqym keledi. Men mınıstr Aıda Balaevanyń usynysy boıynsha Astanadaǵy Qazaq ulttyq óner ýnıversıtetine Kúlásh Baıseıitovanyń esimin berý týraly sheshim qabyldadym. Bul áıgili ánshige kórsetilgen zor qurmet ári erekshe ónerimen tarıhta qalǵan tulǵalarǵa el yqylasynyń aıryqsha belgisi. Túptep kelgende muny tarıhı ádildikti qalpyna keltirý dep túsingen jón», — dedi Qasym-Jomart Toqaev.