Qazaq ulttyq horeografııa akademııasynyń stýdentteri halyqaralyq baıqaýda jeńiske jetti

ASTANA. KAZINFORM – Vengrııanyń Býdapesht qalasynda ekinshi halyqaralyq Budapest ballet Grand Prix baıqaýy ótti. Baıqaýda Qazaq ulttyq horeografııa akademııasynyń stýdentteri jeńis tuǵyrynan kórindi, dep habarlaıdy QR Mádenıet jáne aqparat mınıstrliginiń baspasóz qyzmeti.

Baspasóz qyzmetiniń málimetterine qaraǵanda, Budapest Ballet Grand Prix-ke álemniń 31 elinen jas bıshi qatysty.

Bul baıqaý qatysýshylarǵa álemdik sahnada óz sheberlikterin kórsetýge múmkindik berdi. Konkýrsta Torǵyn Leben birinshi orynǵa, Darıa Mıtrofanova ekinshi orynǵa ıe boldy, al Ádemi Janabil baıqaýdyń dıplomanty atandy.

Baıqaý barysynda qatysýshylar «Pahıta», «Talısman», «Uıqydaǵy arý», «Korsar», «Don Kıhot» klassıkalyq baletterinen jarqyn varıatsııalar kórsetti.

Baǵdarlama kásiptik bilim berý mektep-kolledjiniń basshysy, Akademııa pedagogy Svetlana Kokshınovanyń basshylyǵymen daıyndaldy.

Osyǵan deıin Úkimettiń 2024-2029 jyldarǵa arnalǵan ekomádenıetti damytý tujyrymdamasyn bekitkeni týraly jazdyq.