Qazaq ulttyq horeografııa akademııasy TÜRKÜNİB quramyna endi

ASTANA. KAZINFORM — Qazaq ulttyq horeografııa akademııasy Túrki memleketteri uıymynyń qoldaýymen jumys isteıtin Túrki memleketteri ýnıversıtetteri odaǵyna (TÜRKÜNİB) múshe boldy. Bul týraly Mádenıet jáne aqparat mınıstrliginiń baspasóz qyzmeti habarlady.

— Akademııanyń halyqaralyq birlestikke qosylýy akademııalyq utqyrlyqty damytýǵa, bilim berý jáne ǵylymı yntymaqtastyqty keńeıtýge, sondaı-aq túrki álemi joǵary oqý oryndary arasyndaǵy mádenı baılanystardy nyǵaıtýǵa baǵyttalǵan, — dep atap ótti mınıstrlik.

Buǵan deıin Memleket basshysy Qasym-Jomart Toqaev Túrki memleketteri keńesiniń sammıtinde ortaq bilim berý keńistigin qalyptastyrýdyń jáne túrki elderiniń stýdentteri men oqytýshylary arasyndaǵy akademııalyq almasýlardy qoldaýdyń mańyzyn atap ótken bolatyn.

Aıta keteıik, TÜRKÜNİB quramyna Túrkııa, Ázerbaıjan, Qazaqstan, Qyrǵyzstan, Ózbekstan jáne Majarstannyń 170-ten astam joǵary oqý orny kiredi. Odaqqa Qazaqstan tarapynan ál-Farabı atyndaǵy Qazaq ulttyq ýnıversıteti, L. N. Gýmılev atyndaǵy Eýrazııa ulttyq ýnıversıteti jáne basqa da joǵary oqý oryndary múshe.

Osydan buryn japon balet mektebiniń oqýshylary Qazaq ulttyq horeografııa akademııasynda dáris alǵanyn jazǵan edik.