Qazaq ulany Portýgalııadaǵy fýtbol komandasyna qabyldandy
ASTANA. QazAqparat - Qytaıda fýtboldan jastar quramasynda óner kórsetip júrgen jas qaqpashy Erjet Erzatuly Portýgalııanyń «Gondomar s.c» komandasymen kelisimshartqa qol qoıdy. Bul týraly alaman.kz habarlaıdy.
Erjet 29 qańtarda Portýgalııanyń úshinshi lıgasynda oınaıtyn «Gondomar s.c» komandasymen jartyjyldyq kelisimshartqa qol qoıdy. Ol Eýropa esigin ashqan tuńǵysh shynjańdyq fýtbolshy bolyp otyr. Portýgaldyq ujymnyń qaqpasyn kúzetýdi mindetine alǵan ol aldaǵy ýaqytta ózin jaqsy qyrynan tanyta alsa, Eýropa alańdaryna jol ashylýy ábden múmkin. Erjet 1993 jyly Shyǵys Túrkistannyń Tarbaǵataı aımaǵynda týylǵan. 2009 jyly Astanada ótken prezıdent kýbogynda Qytaı jastar quramasy atynan qatysyp, jaqsy qyrynan tanylǵan. Qytaı premer lıgasyndaǵy birqatar komandalardyń jasaǵan usynystaryna qaramaı, Portýgalııanyń tómengi lıga komandasyn tańdaýynyń sebebin ol «Eýropada oınaý - burynnan bergi armanym. Sol úshin Eýropaǵa baramyn», - dep túsindiredi. Aıta keteıik, «Gondomar s.c» komandasy 1921 jyly qurylǵan. Portý aımaǵyndaǵy Gondomar qalasyna ornalasqan. Bul komanda buryn Portýgalııanyń A dárejeli lıgasynda oınaǵan. Keıin kelisilgen matchtarǵa qatysy bar degen sheshimnen soń tómengi lıgaǵa túsirilgen.
