Qazaq-túrikmen kólik-tranzıt baılanysy: SІM basty jobalardy atady
ASTANA. Kazinform – Eki eldiń kóliktik-tranzıttik baılanysyn belsendi túrde tereńdetýge erekshe mán beremiz. Bul týraly Túrikmenstan Mınıstrler kabıneti tóraǵasynyń orynbasary – Syrtqy ister mınıstri Rashıd Meredovpen ótken kelissózden keıin Premer-mınıstrdiń orynbasary – Syrtqy ister mınıstri Murat Nurtileý aıtty.
— Túrikmen kapıtalynyń qatysýymen Qazaqstanda 100-ge jýyq kompanııa qyzmet etedi. Qarym-qatynastarymyzdyń taǵy bir myqty dińgegi — tranzıttik-kóliktiń baılanysyn belsendi túrde tereńdetýge erekshe mán beremiz. Bul salada strategııalyq seriktestiktiń ornaǵanyn rızashylyqpen atap ótýge bolady. Eki el arqyly Azııa-Eýropa, Azııa-Taıaý Shyǵys ishki naryqtaryn qosatyn marshrýttardy damytý memleketterimizdiń halyqaralyq qaýymdastyqtaǵy rólin nyǵaıta túsetini sózsiz, - dedi Murat Nurtileý.
Sondaı-aq ol aldaǵy ýaqytta mán beriletin basty jobalardy atap ótti.
— Osy tusta Qazaqstan, Túrikmenstan, Iran temirjoldarynyń artyqshylyqtaryn tıimdi paıdalaný strategııalyq máni zor qadamdardyń biri bolmaq. Búgingi tańda áleýeti ósip kele jatqan Qytaı-Qazaqstan -Túrikmenstan-Iran temirjol magıstralin damytý da ózara tıimdi jáne halyqaralyq saýdaǵa jańa dem beretin asa mańyzdy ortaq joba. Soltústik-ońtústik dálizi aıasynda Qazaqstan-Túrikmenstan jáne Reseı temirjol uıymdardyń úshjaqty ózara is-qımylyn keńeıtý múddelerimiz toǵysyp otyrǵan taǵy bir transkontınentaldyq bastama. Osy aspektilerdiń barlyǵyn kólik-tranzıt jáne logıstıka jónindegi jumys tobynyń bıyl ótetin kezekti otyrysynda jan-jaqty qarastyrmaqpyz. Shekara mańyndaǵy avtomobıl joldaryn túıistirý jáne ótkizý pýnktterin jańǵyrtý boıynsha birlesken kúsh-jigerdi úılestirýge sóz baılastyq. Elderimiz kóptegen jyl boıy Túrikmen gazyn Qytaı naryǵyna tasymaldaýǵa senimdi áriptes retinde birge jumys istep kele jatyr. Gaz salasynda qol jetkizgen nátıjelermen toqtalyp qalmaı, aldaǵy jyldary aýqymdy jańa jobalardy júzege asyrýǵa biz daıyndyǵymyzdy taǵy da qýattap otyrmyz, - dep túıdi sózin SІM basshysy.
Qazaqstan Túrikmenstanǵa eksport kólemin 120 mıllıon dollarǵa deıin ulǵaıtýǵa daıyn.
Sondaı-aq Qazaqstan men Túrikmenstan kópjaqty strategııalyq seriktestikti tereńdetý týraly deklaratsııa qabyldaǵan edi.
Qazaqstan men Túrikmenstan arasynda taýar aınalymy 1 mlrd dollarǵa deıin artpaq.