Qazaq-túrik lıtseılerdiń qyzmeti QR Bilim jáne ǵylym mınıstrliginiń baqylaýynda
ASTANA. 17 tamyz. QazAqparat - Búgin QR Bilim jáne ǵylym mınıstri Baqytjan Jumaǵulov Astanadaǵy «Nur Orda» qazaq-túrik lıtseıi (QTL) men «Nur Orda» halyqaralyq mektebinde boldy.
QR BǴM-nyń baspasóz qyzmetinen habarlanǵandaı, mınıstr sapar barysynda oqý kabınetteriniń jabdyqtalýymen, muǵalimderdiń kadrlyq áleýetimen, lıtseıdiń oqý baǵdarlamalarymen jáne oqýlyqtarmen tanysty. Odan keıin mınıstr Astana qalasyndaǵy qazaq-túrik lıtseıleriniń basshylarymen kezdesý ótkizdi.
Kezdesýge«KATEV» halyqaralyq qoǵamdyq qorynyń prezıdenti Mesýt Ata arnaıy shaqyryldy. Áńgime barysynda B.Jumaǵulov, ózekti máselelerge nazar aýdartty. Máselen, qazaq-túrik lıtseıleriniń oqý josparlary men baǵdarlamalarynyń qazaqstandyq memlekettik bilim berý standarttarynyń (QMBS) mazmunyna sáıkestigi aıtyldy. QR BǴM olardyń mazmuny men qurylymyna taldaý júrgizip otyratyndyǵy atap ótildi.
Sondaı-aq vedomstvo basshysy, qazaq-túrik lıtseıleri pedagogtarynyń biliktiligin arttyrý júıesin jetildirý qajettigin tilge tıek etip, olardyń arasynda «Bolashaq» baǵdarlamasy boıynsha shet elderde tájirıbe jınaqtaý máselesin atap ótti. Búginde qazaq-túrik lıtseıleri ustazdarynyń 90 paıyzy - Qazaqstannyń, 10 paıyzy - Túrkııa azamattary.
Eldiń bas ustazy qazaq-túrik lıtseıleri oqýshylarynyń tárbıe máselesi, sonyń ishinde olardy dástúrli emes jáne ekstremıstik dinı aǵymdardyń keri yqpalynan alshaqtaý, dúnıetanymdaryn Qazaqstannyń patrıoty negizinde qalyptastyrý - asa mańyzdy ekendigin qadap aıtty.
Sońynda B.Jumaǵulov, qazaq-túrik lıtseıleriniń qyzmeti QR BǴM-nyń udaıy baqylaýynda bolatynyn jáne olarǵa qajetti kómekter kórsetilip turatynyn jetkizdi.
