Qazaq topta oqı júrip, ilimdi nelikten orys tildi kitaptardan izdeýimiz qajet? - kolledj stýdenti O.Rapatskaıa
ASTANA. Qyrkúıektiń 21-i. QazAqparat /Gúlmıra Álıakparova/ - Qazaq topta oqı júrip, ilimdi nelikten orys tildi kitaptardan izdeýimiz qajet? Kókeıinde júrgen bul saýalyn búgin Astanadaǵy Kongress-Holl saraıynda ótken memlekettik tildi meńgergen ózge ult jastarynyń respýblıkalyq forýmynda Oral Gýmanıtarlyq-tehnıkalyq kolledjiniń stýdenti Olga Rapatskaıa ortaǵa saldy.
O.Rapatskaıanyń pikirinshe, búgingi tańda Qazaqstanda bilim berý úrdisinde aıtarlyqtaı jetistikterge qol jetkizilip otyrǵanymen, orta, arnaýly jáne joǵary oqý oryndarynda memlekettik tildi oqytýda áli de bolsa túıinderi tarqalmaǵan keleli máseleler barshylyq.
Onyń oıynsha olardy sheshý úshin eń aldymen, oqý oryndarynda qazaq toptarynyń sanyn arttyrý qajet. Odan keıin, sol toptardy oqý-ádistemelik quraldarmen tolyq kúıinde qamtamasyz ete otyryp, qazaq tilin ǵylym tiline aınaldyrý kerek.
«Máselen, bizde muǵalimder úıge tapsyrma bere otyryp, ol tapsyrma qazaq oqýlyqtarynda joq ekendigin jáne ony orys kitaptardan taýyp alyp, aýdarý qajettigin birden aıtady. Biz qazaq topta oqı otyryp, nelikten bilimdi orys kitaptarynan izdeýimiz kerek? Nelikten bizge oqýlyqtar jetispeıdi?», - deıdi ol.
Sonymen birge O.Rapatskaıa: «Memlekettik tilde ótkiziletin sabaqtardyń sapasyn arttyrý qajet. Jastarmen uıymdastyrylatyn qoǵamdyq tárbıe jumystaryn qazaq tilinde ótkizý kerek. Qazir kópshilik jasqa úlgi bolyp júrgen sahna juldyzdary men basqa da esimi áıgili adamdar qazaqsha sóılese ıgi bolar edi», - degen tilekterin bildirdi.
«Sonymen qatar, bizdiń mınıstr apalarymyz ben aǵalarymyz, basshylyqta otyrǵan azamattar qazaqsha sóılese eken deımin. Sebebi, qazir biz olardyń kıim-kıisine, shash úlgisine qyzyǵatyn bolsaq, olar qazaqsha sóılep jatsa, biz olardyń qazaqsha sóılegenine qyzyǵar edik», - dedi.
