Qazaq tiliniń ulttyq AI jobalary júzege asyrylady
ASTANA.KAZINFORM - Memleket basshysynyń jasandy ıntellekt salasyn damytý jónindegi tapsyrmalaryn iske asyrý aıasynda Qazaqstanda ulttyq AI ekojúıesin qalyptastyrý boıynsha júıeli jumystar jalǵasyp keledi.
Osy baǵyttaǵy mańyzdy bastamalardyń biri retinde Sh.Shaıahmetov atyndaǵy «Til-Qazyna» ulttyq ǵylymı-praktıkalyq ortalyǵynyń Jasandy ıntellekt departamenti óz qyzmetin Alem AI halyqaralyq jasandy ıntellekt ortalyǵy bazasynda jalǵastyrady.
Bul sheshim QR Ǵylym jáne joǵary bilim mınıstrligi men QR Jasandy ıntellekt jáne tsıfrlyq damý mınıstrligi arasyndaǵy kelisim negizinde qabyldandy. Jańa format qazaq tiliniń tsıfrlyq tehnologııalardaǵy áleýetin arttyrýǵa baǵyttalǵan ǵylymı jáne ınnovatsııalyq jobalardy Astana Hub tehnoparki men Alem AI ekojúıesinde birlesip júzege asyrýǵa múmkindik beredi.
– Bul – ǵylym, memlekettik basqarý jáne tehnologııalyq qaýymdastyq arasyndaǵy yqpaldastyqty jańa deńgeıge kóteretin, sondaı-aq qazaq tiliniń jasandy ıntellekt ekojúıesindegi strategııalyq mańyzyn aıqyndaıtyn mańyzdy qadam, – dedi QR Ǵylym jáne joǵary bilim mınıstri Saıasat Nurbek.
Qazirgi ýaqytta «Til-Qazyna» ulttyq ǵylymı-praktıkalyq ortalyǵy Alem AI ekojúıesimen yntymaqtastyqty keńeıtý jáne ozyq tsıfrlyq sheshimderdi birlesip ázirleý baǵytynda kelissózder júrgizip jatyr.
Taraptar qazaq tiliniń tehnologııalyq áleýetin arttyrýǵa arnalǵan birlesken jobalardy júıeli túrde iske asyrýdy josparlap otyr. Atap aıtqanda, ulttyq tildik qordy keńeıtý, qazaq tiline arnalǵan ulttyq úlken tildik modelderdi (LLM) jetildirý jáne jańa AI sheshimderin ázirleý kózdelgen.
«Til-Qazyna» ortalyǵynyń Jasandy ıntellekt departamenti qazaq tiliniń tsıfrlyq arhıtektýrasyn damytýǵa, ǵylymı-zertteý jumystaryn kúsheıtýge, jasandy ıntellekt agentterin ázirleýge jáne qazaq tiliniń AI salasyndaǵy básekege qabilettiligin arttyrýǵa baǵyttalǵan jumystardy júzege asyrady.
Aıta keteıik, «Ádilet» partııasynyń kezekten tys III sezinde saılaýaldy baǵdarlama bekitilip, partııa Saıası keńesiniń múshesi Baǵdat Mýsın tsıfrlandyrý, jasandy ıntellektini damytý jáne memlekettik qyzmetterdi jetildirý baǵyttaryndaǵy maqsat-mindetterdi tanystyrdy.
