Qazaq tiliniń tsıfrlyq qoryna sheteldegi qazaqtardyń tildik murasy engizildi
ASTANA. KAZINFORM — Qazaq tiliniń tsıfrlyq qoryna sheteldegi qazaqtardyń tildik murasy engizildi. Bul týraly Halyqaralyq «Qazaq tili» qoǵamy men OpenAI kompanııasynyń birlesken jobasynyń jetekshisi Anar Qurmanjanqyzy aıtty.
Onyń aıtýynsha, joba aıasynda qazaq tilindegi mátin men sóıleý derekteriniń sapaly korpýsy jınaqtalyp jatyr.
— Qazaq tiliniń mátindik korpýsy 14 mıllıard tokenge jetti. Ondaǵy materıaldar taqyryp, janr jáne jas erekshelikteri boıynsha jiktelgen. Korpýsqa qazaq tiliniń tarıhı damý kezeńderin qamtıtyn mazmunmen birge sheteldegi qazaq dıasporasynyń tildik murasy da engizildi. Qor bilim, ǵylym, tehnologııa, ekonomıka, quqyq, medıtsına, tarıh, etnografııa, medıa jáne balalar kontentin túgel qamtıdy, — dedi Anar Qurmanjanqyzy.
Halyqaralyq «Qazaq tili» qoǵamynyń prezıdenti Raýan Kenjehanuly bul jobanyń negizgi maqsaty qazaq tiliniń jasandy ıntellekt dáýirinde tolyqqandy qoldanylýyna jaǵdaı jasaý ekenin atap ótti.
— Bizdiń maqsatymyz — qazaq tiliniń jasandy ıntellekt dáýirinde tolyqqandy qoldanylýyna jaǵdaı jasaý. Ol úshin tildiń baı qoryn tsıfrlyq ortaǵa engizýmen qatar, jasandy ıntellektiniń qazaq tilin tabıǵı túsinýi, durys qoldanýy jáne ulttyq mádenı kontekstti eskerýi mańyzdy. Sondyqtan biz derek qoryn qalyptastyrýmen ǵana shektelmeı, onyń sapasyna jáne til modelderin baǵalaý quraldaryna da erekshe mán berip otyrmyz. Bul — bir rettik joba emes, júıeli ári uzaqmerzimdi jumys, — ol.
Eske salaıyq, halyqaralyq «Qazaq tili» qoǵamy men OpenAI arasyndaǵy birlesken joba 2025 jylǵy 7 qarashada Vashıngtonda jasalǵan kelisim aıasynda júzege asyrylyp keledi. Onyń maqsaty — sapaly tsıfrlyq kontent pen senimdi derekter qoryn qalyptastyrý arqyly úlken til modelderiniń qazaq tilindegi jumys sapasyn arttyrý.
Aıta keteıik, buǵan deıin qazaq tilindegi aýdıony mátinge aınaldyrý dáldigi 98%-ǵa jetkeni jaıly jazdyq.
