Qazaq tiliniń konstıtýtsııalyq mártebesi taıǵa tańba basqandaı jazyldy — Prezıdent
ASTANA. KAZINFORM — Konstıtýtsııamyzda elimizdiń tamyry tereń tarıhy men bitim-bolmysy, bolashaqtaǵy beınesi aıqyndaldy. Atap aıtqanda, qazaq tiliniń konstıtýtsııalyq mártebesi taıǵa tańba basqandaı jazyldy. Bul pikirdi Memleket basshysy Qasym-Jomart Toqaev «Qazaq tili» qoǵamynyń H quryltaıynda aıtty.
Prezıdent Egemendigimizdi qorǵaýǵa qatysty máseleniń bári tolyǵymen sheshimin tappaǵanyn basa aıtty.
— Aldymyzda aýqymdy jáne kezek kúttirmeıtin, mańyzdy ári kúrdeli mindetter tur. Halyqaralyq ahýaldy kórip-bilip otyrsyzdar. Álemde saıası, ekonomıkalyq, ıdeologııalyq shıelenister ýshyǵyp tur. Osyndaı almaǵaıyp kezeńde álemniń bolashaǵyn boljaý óte qıyn ekeni túsinikti. Mundaı zamanǵa bizdiń bir ǵana jaýabymyz bar. Bul — birligimizdi bekemdep, ortaq múddege kúsh jumyldyryp, ulttyq jaýapkershiligimizdi tereń sezine otyryp, qasıetti Otanymyz — Qazaqstan Respýblıkasyna adal qyzmet etý, — dedi Prezıdent.
Túptep kelgende, Prezıdent pikirinshe, Egemendikti nyǵaıtý — halyqtyń ál-aýqatyn arttyrý, jańa tehnologııalardy jetik meńgerý, zańdy qurmetteý, tártipke baǵyný, ózara janashyr, eńbekqor, jasampaz bolý, tabıǵatty aıalaý degen sóz.
— Biz osy mindetterdi tabysty oryndasaq, jahan órkenıetiniń tórinen laıyqty oryn alamyz. Sondyqtan Konstıtýtsııada qazirgi zaman talabyna saı bilim men ǵylymdy, ınnovatsııany, adam kapıtalyn damytý memlekettiń strategııalyq mindeti retinde bekitildi. Ultymyzdyń bas qujatynda, ıaǵnı Konstıtýtsııamyzda elimizdiń tamyry tereń tarıhy men bitim-bolmysy, bolashaqtaǵy beınesi aıqyndaldy. Atap aıtqanda, memlekettik til — qazaq tiliniń konstıtýtsııalyq mártebesi taıǵa tańba basqandaı jazyldy, — dedi Memleket basshysy.
Aıta keteıik, Memleket basshysy Qasym-Jomart Toqaev Halyqaralyq «Qazaq tili» qoǵamynyń H quryltaıynda sóz sóılep jatyr.
Prezıdent qazaq tiliniń abyroı-bedelin arttyrý úshin tabandy jumys isteý kerektigin aıtýda.
Jańa Konstıtýtsııada «Táýelsizdik» jáne «Egemendik» sózderin bas árippen jazylatyn boldy.
