Memleket basshysy «Qazaq tili» qoǵamynyń múshelerine rızashylyǵyn bildirdi
ASTANA. KAZINFORM – «Qazaq tili» qoǵamy – memlekettik tildiń myzǵymas tuǵyryn nyǵaıtyp júrgen asa mańyzdy qurylym. Bul týraly Memleket basshysy Qasym-Jomart Toqaev «Qazaq tili» qoǵamynyń H quryltaıynda aıtty.
Prezıdent sonaý 1989 jyly irgesi qalanǵan uıymnyń Egemen el tarıhyndaǵy orny bólek ekenin atap ótti.
– Kezinde kórnekti ǵalymdar – akademıkter Ábdýálı Qaıdar jáne Ómirzaq Aıtbaıulynyń bastamasymen qurylǵan «Qazaq tili» qoǵamynyń tarıhı jolyn qazirgi býyn ókilderi men belgili til mamandary laıyqty jalǵastyryp kele jatyr. Búginde uıym músheleri kóptegen tıimdi is-sharalardy, jasampaz jobalardy tabysty júzege asyrýda, – dedi Qasym-Jomart Toqaev.
Memleket basshysy «Qazaq tili» qoǵamynyń ár múshesine shynaıy rızashylyǵyn bildirdi.
– Zańǵar jazýshy Ábish Kekilbaevtyń «Til mereıi – el mereıi» degen qysqa-nusqa, maǵynasy tereń sózi bar. Til – barshamyzǵa ortaq qundylyq. Til – Allanyń qudiretiniń arqasynda adamdarǵa berilgen úlken syı ári múmkindik. Til – adamzattyń negizgi jetistigi. Adam balasynyń oıdaǵydaı damýynyń eń basty sebebi de – til. Biz órkenıetti el retinde ana tilimiz – qazaq tiliniń abyroı-bedelin arttyrý úshin bir el bolyp tabandy jumys isteýimiz kerek. Búgingi jıynnyń basty maqsat-mindeti de – osy, – dedi Prezıdent.
Aıta keteıik, Memleket basshysy Qasym-Jomart Toqaev Halyqaralyq «Qazaq tili» qoǵamynyń H quryltaıynda sóz sóıledi.
Keshe Prezıdent memlekettik tildi úıretýde JI áleýetin barynsha paıdalaný kerektigin aıtty.