Qazaq tilindegi fılmderge suranys artýda
ASTANA. KAZINFORM – Qazaq tilindegi fılmderge suranys artyp keledi. Bul týraly Mádenıet jáne aqparat vıtse-mınıstri Qanat Ysqaqov aıtty.
Búgin Senattyń jalpy otyrysynda depýtat Aıgúl Qapbarova sheteldik blokbasterlerdi qazaq tiline dýblıajdaýǵa qatysty suraq qoıdy.
«Bıýdjetten jyl saıyn sheteldik 15 fılmdi qazaq tiline dýblıajdaýǵa memlekettik qoldaý arqyly shamamen 443 mln teńge bólinedi. Keler 2025-2027 jyldary dýblıajǵa osy somada qarajat eskerilgen. Alaıda 2023-2024 jyldary atalǵan qarajat ıgerilmeı, bıýdjetke qaıtaryldy. ıAǵnı eki jylda sheteldik fılmder dýblıajdanbaǵan. Bul rette kórermenniń álemdik deńgeıdegi týyndylardy ana tilinde kórý quqyǵy eskerilmeı otyr. Atap aıtqanda, qarajattyń bıýdjetke qaıtarylýy sebebi nede?», - dep surady senator.
Óz kezeginde vıtse-mınıstr Qanat Ysqaqov byltyr sheteldik 15 fılmdi aýdarýǵa qarajat bólingenin, biraq aýdarma jumystary atqarylmaǵanyn aıtty.
«Basty sebep nede? Eń aldymen, gollıvýdtyq nemese anımatsııalyq fılmderdi qazaq tiline aýdarý úshin bizde birneshe qatań shart bar. Árıne, osy sharttar bizdiń salt-dástúrimizge, zańnamamyzǵa sáıkes keledi. Biraq eki kúrdeli talap bar, ıaǵnı iri dıstrıbıýtorlyq kompanııalar olardy júzege asyra almaı otyr. Birinshiden, árbir gollıvýdtyq nemese anımatsııalyq týyndyny qazaqshaǵa aýdarardyń aldynda onlaın saýalnama bolýy kerek. Oǵan birneshe aı kerek. Ekinshiden, tek qana joǵary reıtıng alýǵa qaýqarly fılmder aýdarylýy qajet degen shart bar. Osy eki talapty oryndaý úshin 3-4 aı ýaqyt ótedi. Bul ýaqyt tym uzaq bolǵandyqtan, oǵan eshkim qyzyǵýshylyq tanytpaıdy. Sondyqtan mınıstrlik Parlament Májilisine tıisti zań jobasyn engizip, bul eki normany jeńildetý jumysyn atqaryp jatyr», - dedi Q. Ysqaqov.
Onyń aıtýynsha, qazir fılmderdi tolyqtaı qazaq tiline aýdarý is-sharalary atqarylyp jatyr. Bul turǵyda dıstrıbıýtorlyq kompanııalar óz qarajatyna osy jumysqa kirisip otyr. Óıtkeni qazaq tilindegi fılmderge suranys artyp keledi.
«Jalpy, bul máseleni baqylaýǵa alamyz. Tıisti zańnamalyq ózgeristi engizip, bólingen qarajatty tııanaqty ári oryndy ıgerýge erekshe mán beremiz», - dedi vıtse-mınıstr.
