Qazaq tilindegi aýdıony mátinge aınaldyrý dáldigi 98%-ǵa jetti
ASTANA. KAZINFORM — Qazaq tiline beıimdelgen transkrıptsııa modelderiniń aýdıony mátinge aınaldyrý dáldigi 98%-ǵa deıin artty. Bul týraly Halyqaralyq «Qazaq tili» qoǵamy men OpenAI kompanııasynyń birlesken jobasynyń nátıjelerin tanystyrý kezinde joba jetekshisi Anar Qurmanjanqyzy aıtty.
Onyń aıtýynsha, joba aıasynda qazaq tilindegi mátin men sóıleý derekteriniń sapaly korpýsy jınaqtalyp, sonyń negizinde jasandy ıntellekt quraldary ázirlenip jatyr.
— Qazaq tiliniń mátindik korpýsy 14 mıllıard tokenge jetti. Ondaǵy materıaldar taqyryp, janr jáne jas erekshelikteri boıynsha jiktelgen. Korpýsqa qazaq tiliniń tarıhı damý kezeńderin qamtıtyn mazmunmen birge sheteldegi qazaq dıasporasynyń tildik murasy da engizildi. Qor bilim, ǵylym, tehnologııa, ekonomıka, quqyq, medıtsına, tarıh, etnografııa, medıa jáne balalar kontentin túgel qamtıdy, — dedi Anar Qurmanjanqyzy.
Qazaq tilindegi aýdıoderekter qory 12 myń saǵatqa jetken. Barlyq jazba syrtqy shý, mýzyka jáne basqa da artyq dybystardan tazartylǵan.
— Sonymen qatar qazaq tiline beıimdelgen transkrıptsııa modelderi qoldanysqa engizilip, mátinge aınaldyrý dáldigi 98%-ǵa deıin jetkizildi, — dedi joba jetekshisi.
Sonymen qatar Anar Qurmanjanqyzy qazaq tiline arnalǵan Document AI jáne NLP quraldary jasalǵanyn atap ótti
— Olardyń qatarynda qazaq tilindegi mátindi joǵary dáldikpen tanıtyn OCR júıesi, gazet, kitap jáne PDF qujattarynyń qurylymyn ajyratý, kópbaǵandy betterdi durys retpen oqý jáne derekterdi tazartý tetikteri bar, — dedi ol.
Aıta keteıik, Halyqaralyq «Qazaq tili» qoǵamy men OpenAI arasyndaǵy birlesken joba 2025 jylǵy 7 qarashada Vashıngtonda jasalǵan kelisim aıasynda júzege asyrylyp keledi. Jobanyń maqsaty — sapaly tsıfrlyq kontent pen senimdi derekter qoryn qalyptastyrý arqyly úlken til modelderiniń qazaq tilindegi jumys sapasyn arttyrý.
Buǵan deıin jasandy ıntellektiniń qazaq halqynyń tarıhy, salt-dástúri men mádenıetin qanshalyqty biletini arnaıy synaq arqyly tekserilgeni habarlandy.
