Qazaq tilinde JI paıdalaný aǵylshyn tilinen úsh ese qymbat — Baǵdat Mýsın
ASTANA. KAZINFORM — Qazirgi tańda qazaq tilinde jasandy ıntellektini paıdalaný aǵylshyn tilimen salystyrǵanda úsh ese, al orys tilimen salystyrǵanda eki ese qymbatqa túsedi.
Bul týraly Halyqaralyq «Qazaq tili» qoǵamy men OpenAI kompanııasynyń birlesken jobasynyń nátıjelerin tanystyrý kezinde «Qazaqtelekom» kompanııasynyń basqarma tóraǵasy Baǵdat Mýsın aıtty.
Spıkerdiń sózinshe, qazaq tilindegi jasandy ıntellektiniń tıimdiligin arttyrý qazir sheshýdi qajet etetin mańyzdy máselelerdiń biri.
— Qazir qazaq tilinde jasandy ıntellektini paıdalaný tıimdiligi jaǵynan másele bar. Máselen, qazaq tilinde qoıylǵan suraqqa jaýap alý aǵylshyn tilimen salystyrǵanda úsh ese, orys tilimen salystyrǵanda eki ese qymbatqa túsedi. Sondyqtan qazir osy aıyrmashylyqty azaıtyp, qazaq tilindegi JI tıimdiligin arttyrý baǵytynda bir top azamat jumys istep jatyr, — dedi Baǵdat Mýsın.
Kompanııa basshysynyń aıtýynsha, qazaq tilindegi jasandy ıntellektiniń tıimdiligin arttyrý — ınfraqurylym turǵysynan sheshýdi qajet etetin másele.
— Bizdiń kompanııa JI-degi qazaq tiliniń sapasyn jaqsartýǵa óz úlesin qosýǵa daıyn. Osy rette Ekibastuzda salynyp jatqan úlken derekter ortalyǵynyń múmkindikterin qazaq tilin damytý úshin paıdalanýǵa ázirmiz, — dedi ol.
Baǵdat Mýsın qazaq tilindegi jasandy ıntellekt quraldarynyń sapasyna da toqtaldy. Onyń aıtýynsha, qazaqstandyqtar jańa tehnologııalardy tez ıgerip, kúndelikti ómirde belsendi paıdalanady. Bul qazaq tilindegi JI quraldarynyń sapasyna da oń áser etip otyr.
— Qazaq halqynyń bir jaqsy jeri — biz tehnologııany ıgerý jaǵynan óte ıkemdimiz. Kez kelgen tehnologııany tez paıdalanyp ketemiz. WhatsApp, Telegram, qazir mine ChatGPT kelip jatyr. Ony qural retinde kóp qoldanǵandyqtan, sapasy da jaqsara túsedi, — dedi ol.
Onyń sózinshe, jasandy ıntellekt modelderiniń jetildirilýi de qazaq tiliniń bul tehnologııaǵa beıimdelýine yqpal etip jatyr. Qazir ChatGPT-den bólek Qwen, Google Gemini sekildi basqa da modelder bar.
— Kúndelikti paıdalanýǵa ChatGPT múmkindigi jetkilikti. Alaıda tehnologııalyq taqyryptardy, qazaq mádenıetine qatysty mazmundy nemese Abaıdyń qara sózderin taldaý kezinde maǵyna basqa jaqqa aýytqyp ketýi múmkin. Sondyqtan ol qazaq tilin tereń meńgergen mamandar men tehnologııa salasy ókilderiniń birlesip jumys isteýi mańyzdy, — dedi kompanııa basshysy.
Aıta keteıik, buǵan deıin qazaq tilindegi aýdıony mátinge aınaldyrý dáldigi 98%-ǵa jetkeni habarlandy.
