Qazaq tilinde án shyǵarǵym keledi — Silk Way Star jobasynyń jeńimpazy
ASTANA. KAZINFORM — Silk Way Star halyqaralyq vokaldyq baıqaýynyń jeńimpazy, Mońǵolııadan kelgen Mıshel Djozef qazaq tilinde án jazýdy josparlap júrgenin málimdedi, dep habarlaıdy Kazinform tilshisi.
Bul týraly ánshi Qazaqstan Respýblıkasy Prezıdenti janyndaǵy Ortalyq kommýnıkatsııalar qyzmetinde ótken baspasóz konferentsııasynda aıtty.
— Qazirdiń ózinde qazaqsha án daıyndap jatyrmyn. Óıtkeni qazaq mádenıeti men tilin óte jaqsy kóremin. Qazaq tili — óte ádemi til, ony úırengim keledi. Sol sebepti qazaq tyńdarmandaryma osy tilde án shyǵarýdy uıǵardym, — dedi Mıshel.
Ol sondaı-aq baıqaý qatysýshylary men qazylar alqasyna úlken tájirıbe syılaǵany úshin alǵysyn bildirdi.
— Fınalda ózimdi keremet sezindim, biraq jobanyń aıaqtalǵany azdap kóńilge qaıaý túsirdi. Soǵan qaramastan, kelesi jyly da osy baıqaýǵa qatysqym keledi, — dep atap ótti ol.
Eske sala ketsek, Silk Way Star alǵashqy azııalyq vokaldyq megajobasynyń grand-fınaly 23 qarasha kúni Astanada ótti. Bas júldeni Mońǵolııa ókili Mıshel Djozef jeńip alǵan bolatyn.