Qazaq tilin jetik bil: testileý erejesi ázirlendi
ASTANA. KAZINFORM – Til saıasaty komıteti «Qazaq tilin meńgerý deńgeıin baǵalaýdyń QAZTEST júıesi qaǵıdalaryn bekitý týraly» buıryǵyn ázirledi.
Qandaı da bir memlekettik mekemede, kez kelgen uıymda memlekettik tildiń keńinen qoldanylýy, nasıhattalýy tikeleı sol mekemeni basqaryp otyrǵan basshynyń qoıǵan talabyna baılanysty ekeni anyq.
Sonymen, testileý erejesinde qandaı erejeler qamtylǵan?
QAZTEST júıesi negizindegi testileýdi QR Ǵylym jáne joǵary bilim mınıstrliginiń «Ulttyq testileý ortalyǵy» memlekettik kásiporny júzege asyratynyn atap ótken jón.
QAZTEST testileýdiń eki túrinen turady: dıagnostıkalyq jáne sertıfıkattaý. Testileý qaǵaz nemese elektrondy formatta júrgiziledi.
Dıagnostıkalyq testileý ýaqyty - 1 saǵat 10 mınýt (70 mınýt). Sertıfıkattaý testileý ýaqyty - 2 saǵat 7 mınýt (127 mınýt).
Astana qalasynda jeke tulǵalar úshin testileýdiń ótetin ornyn Ulttyq testileý ortalyǵy anyqtaıdy. Zańdy tulǵalar testileý zaldary bolǵan jaǵdaıda shaqyrýshy taraptyń ǵımaratynda synaqtan ótedi. Al oblys ortalyqtarynda jáne respýblıkalyq mańyzy bar qalalarda tapsyrys berýshiniń mekemesinde júrgiziledi.
Testileýge ótinimder tómendegi tetikter arqyly qabyldanady:
- kazakhtest.kz saıty (jeke tulǵalar úshin);
- Ortalyqtyń keńsesi (zańdy tulǵalar úshin).
Testileý zalyna jeke tulǵalar ótinish jáne jeke basyn kýálandyratyn qujat negizinde jiberiledi. Sonymen qatar, tólem jasalǵan jaǵdaıda jeke tulǵalar onlaın tólem jasaý kezinde qyzmetke tólengenin rastaıtyn qujatty (túpnusqany) usynady. Tapsyrys nómirin kórsete otyryp, túbirtek kóshirmesin usynady.
Jalpy, testileýdiń erejesin siltemege ótip, tanysa alasyz.
Elimizde til saıasatyn iske asyrýdyń 2020-2025 jyldarǵa arnalǵan memlekettik baǵdarlamasyna sáıkes, QAZTEST júıesi memlekettik tildi meńgergen eresek turǵyndardyń úlesin arttyrýdyń negizgi kórsetkishin iske asyrý tetigi retinde qarastyrylyp, memlekettik qyzmetshiler men memlekettik qyzmet kórsetetin uıym qyzmetkerlerine, ulttyq kompanııalar men holdıngterdiń qyzmetkerlerine, «B» korpýsynyń memlekettik ákimshilik laýazymyna ornalasý úshin úmitkerlerge QAZTEST júıesi boıynsha testileý ótkizý mindeti qoıylyp otyr.
Osyǵan oraı, memlekettik baǵdarlamanyń mindetterin oryndaý maqsatynda ortalyq jáne jergilikti organnyń, memlekettik qyzmet kórsetetin mekemelerdiń qyzmetkerleri men ulttyq kompanııalar men holdıngterdiń qyzmetkerleri jyl saıyn QAZTEST testileýinen ótetinin atap ótken jón.
