Qazaq tilin úırenýge nıet bildirgender arasynda 78 jastaǵy apa da bar — Vasılıı Berezovskıı

ÓSKEMEN. KAZINFORM — Vasılıı Berezovskıı Óskemendegi Oralǵan Bókeı atyndaǵy kitaphananyń «Kel sóıleseıik» qazaq tildi klýbynda sabaq berip júr. Oǵan oqýshylar ǵana emes, zeınetkerler de kelip, memlekettik tildi meńgerip jatyr.

— Ózim Taldyqorǵan qalasynyń týmasymyn. Aýlada qazaq balalarymen birge oınap júrip óstik. 7 jasymda Óskemenge kóship keldim. Biraq maǵan mektepke deıin ereje boıynsha qazaqsha qalaı durys sóıleý kerektigin eshkim úıretpedi. Septikterdiń qalaı ekenin muǵalimderden uqtyq qoı. 9-synyptan bastap 3 jyl boıy qatarynan qazaq tilinen qalalyq olımpıadadan birinshi oryn aldym, — deıdi Vasılıı Berezovskıı.

Onyń Oralǵan Bókeı atyndaǵy kitaphananyń «Kel sóıleseıik» qazaq tildi klýbynda sabaq berip júrgenine 2 jyldan asty.

— Sabaqta aýyzeki qazaq tilin úıretemin. Dúkende satýshymen, taksıge otyrǵanda júrgizýshimen sóılesýden, kóshede adasyp qalǵanda mekenjaıdy suraýdan bastaımyz. Ózim shoýmen bolǵandyqtan ázil qosyp, qyzyqty ótkizýge tyrysamyn. Barlyǵy 20-dan astam adam keledi. Olardyń arasynda mektep oqýshylary, túrli salada jumys isteıtin azamattar men zeınetkerler bar. Eń egde jastaǵy klýb qatysýshysy — 78 jasta, — deıdi til klýbynyń oqytýshysy.

Óz sózinde ol qazaq tilin bilgenniń paıdasy óte mol ekendigin, qoǵamǵa, túrli ortaǵa erkin sińisýge, jańa dostar tabýǵa múmkindik jasaıtynyn atap ótti.

— Jalpy, birneshe til bilgen adam eń áýeli ózin damytady. Qazir men oryssha sóılegende de keı sózderdi baıqamaı qazaqsha aıtyp jiberemin. Qasymdaǵylar túsinbeı qalady. Birde orys dosyma «jetedi, jetedi» dep jatsam «chto govorısh?» deıdi. Sol kezde «hvatıt» degendi eske túsire almaı, birshama turyp qalǵanym bar (kúldi). Saýda úılerindegi, dúkenderdegi satýshylarmen qazaqsha sóıleskenimde olar únemi jyly shyraı tanytyp, kúlimdep, ózim týraly surap jatady, — deıdi Vasılıı Berezovskıı.

Eske salsaq, osyǵan deıin Reseıden kóship kelgen Alena Svırıdenko Marqakólde qazaq tilinen sabaq berip júrgeni jaıly jazǵanbyz.