Qazaq tilin meńgerý azamattarǵa qandaı múmkindikter beredi – mınıstrlik jaýaby
ASTANA. KAZINFORM – Eldegi tegin til oqytý ortalyqtarynda qazaq tilin úırenýshilerdiń basym bóligi - memlekettik qyzmetshiler men bilim berý salasynyń ókilderi. Bul týraly Ǵylym jáne joǵary bilim mınıstrliginiń Kazinform saýalyna joldaǵan jaýabynda aıtylǵan.
Jyl saıyn memlekettik tildi meńgergen turǵyndardy anyqtaý úshin memlekettik qyzmetshiler men bıýdjettik sala qyzmetkerleri, ulttyq kompanııa ókilderi memlekettik tildi bilý deńgeıi boıynsha QAZTEST júıesi arqyly test tapsyrady.
- 2024 jyly dıagnostıkalyq testileýden 20 myń adam, sertıfıkattyq testileýden 11 513 myń adam ótti. QAZTEST sertıfıkaty «Bolashaq» halyqaralyq baǵdarlamasy arqyly oqýǵa túsýge, «Nazarbaev Zııatkerlik mektepteri» DBBU-nyń pedagogıkalyq quramyna qabyldanýǵa, QR UQK akademııasyna túsýge, Prezıdenttik jastar kadr rezervine qabyldanýǵa, QR Prezıdenti janyndaǵy Memlekettik basqarý akademııasyna magıstratýra men doktorantýraǵa túsýge, QR joǵary oqý oryndarynyń doktorantýrasyna túsýge múmkindik beredi.
2025 jyldyń 1 jeltoqsanynan bastap joǵary oqý oryndaryna rektorlar laýazymyna taǵaıyndalatyn úmitkerlerge QAZTEST júıesi arqyly test tapsyrý mindettelip otyr.
2024 jyldan bastap Qazaqstan Respýblıkasynyń azamattyǵyn alǵysy keletin azamattarǵa da qazaq tili, Qazaqstan tarıhy jáne QR Konstıtýtsııasy negizderinen test tapsyrý mindettelip, 141 adam sertıfıkat aldy, - dep jazady vedomstvo mamandary.
2024 jyly jergilikti atqarýshy organdardyń janyndaǵy qazaq tili kýrsynan 45 114 adam ótken.
- Onyń ishinde memlekettik qyzmetshiler – 9 398, quqyq qorǵaý organdarynan – 4 233, bilim berý salasynan – 8 892, memlekettik qyzmet kórsetý salasynan – 3 657, medıtsına qyzmetkerleri – 2 594, jeke tulǵalar – 8 752, BAQ ókilderi – 117, halyqqa qyzmet kórsetý ortalyqtary – 4 318 adam, - dep jazylǵan jaýapta.
Sondaı-aq byltyr ulttyq kompanııalar 3 153 adamǵa memlekettik til oqytý kýrstaryn uıymdastyrǵan. («Qazatomónerkásip» ulttyq atom kompanııasy – 4, «Kegoc» – 1 170, «Damý» kásipkerlikti damytý qory – 104, «Qazaqstan temir joly» – 944, «QazMunaıGaz» – 243, «Qazposhta» - 343, «Qazaqtelekom» – 307, «Samuryq Qazyna» – 38).
- Ortalyq memlekettik organdarda – 316 adam (QR Densaýlyq saqtaý mınıstrligi – 20, QR Qarjylyq monıtorıng agenttigi – 30, QR Eńbek jáne halyqty áleýmettik qorǵaý mınıstrligi – 28, QR Prezıdentiniń Іs basqarmasy – 127, QR Qorǵanys mınıstrligi – 90, QR SІM - 21) memlekettik til oqytý kýrstaryna tartyldy. «Abaı ınstıtýty» onlaın platformasy arqyly - 121 adam, jeksenbilik mektepter arqyly – 290 adam memlekettik til úırendi, - delingen resmı málimette.
Buǵan deıin habarlaǵanymyzdaı, 21 aqpan – Halyqaralyq Ana tili kúnine oraı, Kazinform Ǵylym jáne joǵary bilim mınıstrligine saýal joldaǵan bolatyn. Mınıstrlik jaýabynda eldegi til oqytý ortalyqtarynda óziniń ana tilin oqyp júrgenderdiń naqty sany aıtylǵan.
Resmı málimet boıynsha qańtar aıynda UBT tapsyrǵan talapkerlerdiń 76,81%-y qazaq tilinde, 23,14%-y orys tilinde, 89 adam aǵylshyn tilinde testileýden ótken.