Qazaq tilin damytý qory: Prezıdenttiń bastapqy úlesi 100 eseden astam artty
ASTANA. KAZINFORM — «Halyqaralyq Qazaq tili qoǵamynyń» endaýment qoryna 830 mıllıon teńgege jýyq qarajat jınaldy. Bul týraly BIZDIÑ ORTA podkastynda «Qazaq tili» halyqaralyq qoǵamynyń prezıdenti Raýan Kenjehanuly aıtty.
— «Halyqaralyq Qazaq tili qoǵamynyń» endaýment qory quryldy. Qazir qorǵa 830 mıllıon teńgege jýyq qarajat jınaldy. Qordy basqaryp otyrmyz. Túsken qarajat esebinen joǵaryda aıtylǵan jobalardyń barlyǵyn júzege asyryp jatyrmyz. Biz osy ýaqytqa deıin memleketten eshqandaı qarajat alǵan joqpyz. Jınalǵan qarjynyń barlyǵy — kásipkerlerdiń qoldaýy. Prezıdent endaýment qoryna alǵashqylardyń biri bolyp óz qarajatynan 7 mıllıon teńge saldy. Sodan beri biz Prezıdenttiń bastapqy úlesin 100 eseden astam arttyra aldyq. Qorǵa eldegi kásipkerler de úles qosyp jatyr, — dedi ol.
Onyń paıymynsha, qazir bıznestiń de, memlekettiń de, basqa da ortanyń tilge degen nıeti men kózqarasy óte jaqsy.
— Tek osy jumysty abyroıǵa nuqsan keltirmeı, túrli keleńsizdikke jol bermeı, baıyppen, ashyq ári jarııa túrde, sapaly jobalar arqyly júzege asyrýdy úırenýimiz kerek dep oılaımyn. Osy baǵytta jumys istep jatyrmyz. Qoǵamnyń barlyq óńirde fılıaldary bar. Budan bólek, jyldan-jylǵa jalǵasyp kele jatqan «Ana tili» olımpıadasy, «Jarqyn bolashaq» olımpıadasy, «Ulttyq dıktant» sııaqty júıeli jobalarymyz bar. Bul bastamalar da toqtap qalmaı, jyl saıyn jalǵasyp, jańaryp, aýqymyn keńeıtip keledi, — dedi ol.
Buǵan deıin Raýan Kenjehanuly qazaq tilin damytýdyń úsh baǵytyn atady.
