Qazaq tildi ІT startaptarǵa grant beriledi

ASTANA. KAZINFORM – Tsıfrlyq damý mınıstrliginiń granttary ishine qazaq tildi ІT startaptardy qosý múmkindigi qarastyrylyp jatyr. Halyqaralyq «Qazaq tili» qoǵamynyń prezıdenti Raýan Kenjehanuly vedomstvo basshylyǵymen osyndaı kelisimge kelgenin aıtady.

- Buǵan deıin Tsıfrlyq damý mınıstrliginiń qoldaýymen Digital Bridge degen úlken is-shara ótti. Sol sharanyń bir sessııasyn qazaq tili men jasandy zerde taqyrybyna arnadyq. Ol kezdegi mınıstr Baǵdat Mýsın – «Qazaq tili» qoǵamy Ortalyq keńesiniń múshesi. Qazir qyzmeti aýysqanmen, ýádesi bar. Mınıstrliktiń qazirgi basshylyǵy da qarsy emes. Biz bul jerde dáneker bolyp, mınıstrlik usynyp otyrǵan granttardyń ishine bir taqyryp retinde qazaqsha startaptardy qosqymyz keledi. Granttyq baǵdarlama bar, jańadan oılap tabýdyń qajeti joq. Tek erejesin engizip, qazaq tildi jobalardy bólek baıqaýda synaýymyz kerek. Byltyr qyryq shaqty jobanyń sharýasymen júrip, ýaqyt bóle almaǵan edik. Bıyl osy máselege qaıtyp kelemiz, - deıdi Raýan Kenjehanuly.

Sondaı-aq ol Halyqaralyq «Qazaq tili» qoǵamynyń qolynda qazaq tilin qurylys, kommýnaldyq sharýashylyq, jer qoınaýyn paıdalaný, ónerkásip sııaqty salalardyń tili etýge laıyqty jobasy bar adamdarǵa qoldaý kórsetetin múmkindik bar ekenin aıtady.

- Kórsetiletin qoldaýdyń kólemi men mólsheri usynatyn jobasynyń aýqymyna baılanysty. Búkil sharýany ysyryp qoıyp, tek qana osymen aınalysamyn dese, jobasynyń merzimi men qunyn naqty aıtsa, jolyn birge tabamyz. Óıtkeni demeýshilik degende, óz qaltamyzdan sýyryp alyp bere salmaımyz. Qurylys salasyn qazaqsha sóıletemin dese, qurylys kompanııalarynyń basshylarymen sóılesemiz. Mınıstr de ýádesin berdi. Bizdiń qyzmetimiz dánekerlik jasap, kepil bolý dep sanaımyz. Sapasyna kúsh salyp, qadaǵalaýdy óz moınymyzǵa alamyz. Qurylysqa ǵana emes, kez kelgen salaǵa osyndaı ustanymmen qaraımyz, - dedi qoǵamnyń prezıdenti.

Suhbattyq tolyq nusqasyn myna siltemeden oqýǵa bolady.