Qazaq tili úshin jańa tsıfrlyq platforma jasalady – Aımaǵambetov

ASTANA. KAZINFORM – Májilis depýtaty Ashat Aımaǵambetov Prezıdent qol qoıǵan jańa zańda qandaı ózgerister bar ekenine toqtalyp ótti. Bul týraly depýtat áleýmettik jelidegi paraqshasynda jazdy. 

- Bizdiń avtorlyǵymyzben daıyndalǵan zań daryndy jastardy qoldap, memlekettik tildi damytýǵa múmkindik jasap, jasandy ıntellektpen úılestirip, bilim berý júıesin jetildirýge baǵyttalǵan. Eń bedeldi halyqaralyq ǵylymı jarystarda jeńimpaz atanǵan oqýshylar UBT tapsyrmaı-aq memlekettik grantpen ýnıversıtetke túse alady. Bul olardyń elde bilim alyp, Qazaqstannyń damýyna úles qosýyna jol ashady. Buryn mundaı múmkindik tek olımpıada jeńimpazdaryna ǵana beriletin, - dedi Ashat Aımaǵambetov. 

Ol «Bolashaq» baǵdarlamasy keńeıtilip, endi bakalavrıat deńgeıinde de beriletinin atap ótti.

- Buryn «Bolashaq» stıpendııasy tek magıstratýra men doktorantýraǵa arnalǵan bolsa, endi halyqaralyq olımpıada jeńimpazdary bakalavrıat deńgeıinde de oqý múmkindigine ıe bolady, - dedi depýtat.

Qazaq tili úshin jańa tsıfrlyq platforma jasalady.

- Qazaq tiliniń tsıfrlyq ulttyq sózdik qory jáne ulttyq til korpýsy zańmen retteldi. Bul jasandy ıntellektterdiń (ChatGPT, Alısa jáne t.b.) qazaq tilinde sapaly jumys isteýine múmkindik beredi. Memleket basshysy bul mańyzdy máseleni óz baqylaýynda ustap otyr, - dedi ol.

Depýtat qazaq tiliniń barlyq normalary men erejeleri onlaın ashyq júıede qoljetimdi bolatynyn aıtty.

- Bul bastamanyń basty maqsaty – qazaq tilin jasandy ıntellektpen úılestirý jáne tsıfrlyq álemde onyń sapaly jumys isteýine jaǵdaı jasaý, - dedi Ashat Aımaǵambetov.

Tsıfrlyq sózdik qordyń mańyzy:

1 . Jasandy ıntellekt úshin baza:
Bul sózdik qor jasandy ıntellektke qazaq tilinde durys sóıleýdi, sózderdi kontekstke saı qoldanýdy úıretedi.

2. Kúndelikti qoldanys:
Ashyq aqparattyq júıe arqyly kez kelgen azamat sózderdiń durys emlesin, naqty maǵynasyn ońaı taba alady.

3. Bilim berý:
Oqýshylar, stýdentter men muǵalimderge sapaly sózdikter men anyqtamalyqtarǵa qol jetkizý múmkindigi beriledi. Bul oqý men oqytý úderisin jeńildetedi.

- Tsıfrlyq sózdik qor – bul jaı ǵana sózderdiń tizimi emes. Bul – tildi túsinetin, ony durys qoldana alatyn ıntellektýaldy platforma, - dep atap ótti Aımaǵambetov.

Eske salsaq Ashat Aımaǵambetov eńbek naryǵyndaǵy teńsizdik pen mamandar tapshylyǵy máselesin kótergen edi.