Qazaq tili pánin oqytý ádistemesi ózgerdi
ASTANA. KAZINFORM – Oqý-aǵartý mınıstrligi resmı saýalymyzǵa joldaǵan jaýabynda endi mektepterde qazaq tili páni jańa tásildermen oqytylatynyn málimdedi.
– Qazaq tili pánine bólingen saǵat sany qoldanystaǵy úlgilik oqý josparlaryna sáıkes júrgiziledi. Sondyqtan qazirgi kezeńde negizgi nazar pán saǵatyn mehanıkalyq túrde kóbeıtýge emes, oqý baǵdarlamasynyń mazmunyn, oqytý ádistemesin jáne ár sabaqtyń nátıjeliligin arttyrýǵa baǵyttalǵan, – dep málimdedi QR OAM.
Mınıstrliktiń habarlaýynsha, 2016 jylǵa deıin qoldanylǵan bilim berý standarttarynda grammatıkalyq bilimge basymdyq berildi. Al qazirgi baǵdarlamalarda grammatıkany meńgertýmen qatar oqýshylardyń kommýnıkatıvtik daǵdylaryn, sóıleý mádenıetin, oqý jáne jazý saýattylyǵyn damytýǵa erekshe mán beriledi. Orfografııa, morfologııa jáne fonetıka baǵyttary da oqý mazmunynda tıisti deńgeıde qamtylǵan.
– Qazirgi ýaqytta 1–4-synyptardaǵy tildik pánderdiń mazmuny qaıta qaralyp, balanyń óz oıyn erkin jáne júıeli jetkizýine, mátindi túsinip oqýyna, taldaýyna jáne saýatty jazýyna baǵyttalǵan tapsyrmalar kúsheıtildi. Bastaýysh synyptarda endi balanyń tek oqý jyldamdyǵyna emes, oqyǵan mátininiń mazmunyn túsinýine jáne ony óz sózimen jetkize bilýine basymdyq beriledi, – delingen resmı jaýapta.
Tolyǵyraq aıtqanda, jazý saýattylyǵyn arttyrý maqsatynda dıktant, mazmundama jáne shyǵarma aralyq baqylaý júıesine naqty talaptarymen birge engizildi. Olardyń kólemi, taqyryptary men baǵalaý ólshemderi bilim alýshylardyń jas ereksheligine jáne oqý maqsattaryna sáıkes aıqyndalady.
Sonymen qatar mınıstrlik bergen aqparatqa júginsek, oqý baǵdarlamalaryn jetildirý jumystary kezeń-kezeńimen jalǵasady. Qazir 5–9-synyptarǵa arnalǵan baǵdarlamalar qaıta qaralyp jatyr. Bul jumys barysynda kommýnıkatıvtik tásildi, oqý saýattylyǵyn, jazylym men synı oılaý daǵdylaryn damytý baǵyty saqtalady.
Odan bólek, bilim alýshylarǵa usynylatyn qosymsha kórkem ádebıetter men shyǵarmalar tizimi qaıta qaralyp, jańadan jasalady. Mundaǵy negizgi maqsat – balalardyń kitap oqýǵa qyzyǵýshylyǵyn arttyrý, sózdik qoryn baıytý, ádebı til normalaryn meńgertý jáne sóıleý mádenıetin qalyptastyrý.
– Oqý baǵdarlamalaryn jetildirýge Y. Altynsarın atyndaǵy Ulttyq bilim akademııasynyń ǵalymdary men sarapshylary, sondaı-aq qazaq tili men ádebıeti pánderiniń praktık pedagogteri qatysady. Olardyń qatysýymen oqý baǵdarlamalarynyń mazmuny men ony iske asyrý tetikteri boıynsha keshendi jumys júrgizildi, – delingen habarlamada.
Aıta keteıik, buǵan deıin mektep oqýlyqtarynyń qaıta jazylýy sapaǵa qanshalyqty áser etetinin jazǵanbyz.
