Qazaq tili birtindep tehnologııanyń tiline aınalyp kele jatyr — Maqpal Jumabaı

ASTANA. KAZINFORM – Qazaq tili birtindep tehnologııanyń tiline aınalyp kele jatyr. Bul týraly «Jibek joly» telearnasyndaǵy «Búgin LIVE» baǵdarlamasynda Sh. Shaıahmetov atyndaǵy «Til-Qazyna» ulttyq ǵylymı-praktıkalyq ortalyǵynyń Bas dırektory Maqpal Jumabaı aıtty.

— Qazaq tili qoǵamdyq ómirdiń barlyq salasynda erkin qoldanyla bastady. Mysaly adamdardyń kúndelikti ChatGPT-ge jazǵan suraýlarynyń bári tildi osy ómirge beıimdep jatyr. Qazaq tiliniń endigi damýy kúndelikti qoldanysta tsıfrlyq tehnologııalardy qoldaný barysynda qandaı suraý jiberemiz, soǵan baılanysty bolady. Óıtkeni búgingi tehnologııanyń ózegi – generatsııa, ol sizden alǵan aqparatty oqı beredi. Búgin 10 saýal jazsam, ol 10 suraq boıynsha bilimin jetildiredi, - dedi ol.

Odan bólek, spıker tsıfrlyq platformalardy paıdalaný kezindegi qazaq tilin qoldaný kórsetkishin atap ótti.

— «Til-Qazyna» ulttyq ǵylymı-praktıkalyq ortalyǵy aýqymynda aıtar bolsam, biz qoǵamǵa 12 qyzmet usynamyz. Onda 4 mln-nan astam qoldanýshymyz bar. Jylyna bizge 12 mln-nan astam suranys keledi, sonsha saýaldy óńdeımiz. Bul suranystyń óte úlken ekenin kórsetedi. Qazaqstan halqynyń teń jartysynan astamy qazaq tilinde saýal qoıady, - dep atap ótti Maqpal Jumabaı.

Eske sala ketsek, buǵan deıin Qazaqstandyq oqýshylar JI olımpıadasynda rekordtyq nátıje kórsetkenin jazǵan edik.