Qazaq tili alǵash ret halyqaralyq olımpıadada jumys tili retinde bekitildi
ASTANA.KAZINFORM - Azıattyq-Tynyq muhıty lıngvıstıkalyq olımpıadasynda (APLO-2026) qazaq tili alǵash ret halyqaralyq pándik olımpıadanyń jumys tili retinde qoldanyldy. Bul – memlekettik tilimizdiń jahandyq ǵylymı-bilim berý keńistigine yqpaldasýynyń mańyzdy qadamy.
Olımpıada barysynda tapsyrmalar men olardyń resmı sheshimderi uıymdastyrýshylardyń platformasynda qazaq tilinde jarııalandy. Osylaısha, qazaq tiliniń halyqaralyq akademııalyq kommýnıkatsııa quraly retindegi áleýeti is júzinde dáleldendi.
Oqý-aǵartý mınıstrligi málimetinshe, APLO-2026 olımpıadasy Azıattyq-Tynyq muhıty elderi Qazaqstan, Qytaı , Japonııa, Malaızııa, Koreıa Respýblıkasy, Sıngapýr jáne Taılandtan kelgen 300-ge jýyq daryndy oqýshyny biriktirdi. Atalǵan zııatkerlik jarys -daryndy jastardy anyqtaýǵa jáne olardy Halyqaralyq lıngvıstıkalyq olımpıadaǵa daıarlaýǵa baǵyttalǵan bedeldi alań.
Qazaqstan quramasy bul olımpıadaǵa úshinshi ret qatysyp otyr. Bıyl el namysyn 8 oqýshy qorǵady. Nátıjesinde qazaqstandyq oqýshylar 1 altyn, 1 kúmis jáne 2 qola medal jeńip alyp, joǵary daıyndyq deńgeıin kórsetti. Sonymen qatar 4 qatysýshy Qurmet gramotasymen marapattaldy.
Jeke esepte Azııa elderinen iriktelgen úzdik qatysýshylar arasynda Shyńǵys Qarasaev 9-oryndy ıelendi. Al komandalyq esepte Qazaqstan quramasy 8-orynǵa turaqtady. Altyn medaldi Oral qalasyndaǵy jaratylystaný-matematıka baǵytyndaǵy Zııatkerlik mektebiniń 12-synyp oqýshysy Shyńǵys Qarasaev jeńip aldy.
Kúmis júldeni Astana qalasynyń Nura aýdanyndaǵy jaratylystaný-matematıka baǵytyndaǵy Zııatkerlik mektebiniń 12-synyp oqýshysy Ámirbek Azatbekov ıelendi. Aqtaý qalasyndaǵy mamandandyrylǵan IT-lıtseıiniń 11-synyp oqýshysy Ramazan Býtantaev pen Qostanaı oblysy Jitiqara aýdanyndaǵy Abaı atyndaǵy mektep-lıtseıdiń 11-synyp oqýshysy Kırıll Turǵymbaev qola medal ıegeri atandy.
Aıta keteıik, Qazaqstan oqýshylary halyqaralyq matematıkalyq olımpıadadan úsh medal jeńip aldy.
