Qazaq tiliniń mártebesi qýatty bolmasa, táýelsizdigimizdiń ózi de kúmándi bolady
ASTANA. Shildeniń 26-sy. QazAqparat /Rýslan Ǵabbasov/ - Qazaq tili qýatty bolýyna qyzmet jasaý kerek. Bul týraly búgin Úkimette Tilderdi qoldaný men damytýdyń 2011-2020 jyldarǵa arnalǵan memlekettik baǵdarlamasynyń jobasyn talqylaýǵa arnalǵan otyrysta belgili qoǵam qaıratkeri, professor Amangeldi Aıtaly aıtty.
«Etnosotsıologııa iliminde tilderdiń básekelestigi, tilderdiń naryǵy, oppozıtsııasy degen uǵymdar bar. Búgin Qazaqstanda básekege qabiletsiz, tildiń naryǵynda suranysqa onsha ıe emes, álsiz - bul qazaq tili. Al básekege qabiletti, qazaq tiline oppozıtsııa - bul orys tili. Qazaq tili qýatty bolmaı, bizdiń táýelsizdigimizdiń ózi bul kúmándi dúnıe», - dedi A. Aıtaly.
«Sondyqtan, men baǵdarlamadaǵy úshinshi jáne keıingi betterinde «orys tiliniń búgingi qyzmetin saqtaý» degendi túsinbedim. Bul pikir - orys tiliniń basymdylyǵy saqtala beredi degen sóz», - dep toqtala kele A. Aıtaly: «Máseleniń mánisi, orys tiline qarsylyqta emes. Orys tilin jasandy túrde ómirden yǵystyrýǵa da, qoldaýǵa da bolmaıdy. Obektıvti óziniń suranysyna qaraı damýy kerek. Al endi memlekettik tildi qoldasaq, atap aıtqanda orys tiliniń qyzmeti búginge deıin álsiredi jáne álsireı beredi, bul - zańdylyq. Biraq bir memlekette eki tildiń bıligi bolmaıdy», - dedi A. Aıtaly. Osy turǵyda ǵalym ózge elderde bir tildiń ǵana ústemdigi qoldanylatynyn aıtyp ótti.
