Qazaq tiliniń kósegesin jastar kógertedi
ALMATY. 13 qazan. QazAqparat /Ádilet Musahaev/ - Ulttyq bolmysty saqtap qalý úshin árkim óziniń tarıhymen tárbıelenýi kerek. Óziniń ulttyq mádenıetimen, qundylyqtarymen maqtanýy qajet.
Bul jaıynda jazýshy-jýrnalıst Beıbit Qoıshybaev QazUÝ stýdentterimen kezdesý barysynda aıtty.
Elbasy óz Joldaýynda Qazaqstan turǵyndaryna qazaq tilin meńgerýdiń sapasyn arttyrýdy talap etip otyrǵan tusta sol talap údesinen shyǵýdy ońtaılandyrýda jastar da qalys qalmaýy qajet. Osy baǵytta búgin Ál-Farabı atyndaǵy Qazaq ulttyq ýnıversıteti Jastardyń rýhanı ortalyǵynda qoǵamdaǵy memlekettik til máselesine baılanysty arnaıy alqasóz ótti. Basqosýǵa stýdentter, qoǵamdyq uıym ókilderi qatysty.
«Qazaq tili damyǵan til, aldymyzdaǵy mindet onyń aıasyn keńeıtip, qajettiligin arttyrý. Bul olqylyqtardyń ornyn tek jastarymyzdyń boıyndaǵy ultqa degen súıispenshilik, tilge degen qurmet qana toltyra alady», - deıdi stýdenttermen qazaq tiliniń qudiretin bólise kelgen B.Qoıshybaev.
Sonymen qatar ol, ana tiliniń qudiretin arttyra túsý úshin kúndelikti qoldanysta qazaqsha sóılep, ana tilinde til qatýǵa shaqyrdy. Al jazýshy, akademık, qoǵam qaıratkeri Moldaǵalı Matqan: «Qazaq halqynda eshbir ultta joq ulylyq bar. Bizder, ásirese myna otyrǵan jastar, sol ulylyqty aınalymǵa engizip, ulttyń ulylyǵyn ulyqtaı bilýi mindet. Ult bolmasa mamannyń da qajeti joq», - dep pikir bildirip, stýdentter bir jaqty mamandanyp qoımaı ult bolashaǵy úshin, zııalylyqtyń mańyzyn túsinýge, ult zııalysy bolyp qalyptasýǵa búginnen kirisýge shaqyrdy.
Pikir almasý túrinde ótken basqosý «Memlekettik til - ulystardy uıystyrýshy faktor» jáne «Qazaq brendi: ultaralyq tatýlyq» degen ózekti taqyryptar tóńireginde sóz qozǵady.
