Qazaq tiliniń damýy úshin saıası sheshimder qajet - Berik Ábdiǵalıev
ANA. Qarashanyń 9-y. QazAqparat /Marlan Jıembaı/ - Qazaq tiliniń damýy úshin saıası sheshimder qajet.
Búgin elordada «Qazaq tili - saıası kommýnıkatsııada» taqyrybynda ótken dóńgelek ústel barysynda Memlekettik tildi damytý prezıdenttik qorynyń dırektory Berik Ábdiǵalıev osyndaı pikir bildirdi, dep habarlaıdy QazAqparat.
«Qazaq tiliniń máselesi qarajatqa, oqýlyqqa, ádistemege, mamanǵa emes, saıasatqa tirelip tur. Sondyqtan saıasatta qandaı ózgerister, qandaı saıası sheshimder kerektigin túsinýge tıispiz. Osyǵan oraı mamandardy, sarapshylardy shaqyryp, qazaq tiliniń damýy zańǵa ma nemese Úkimettiń qandaı da bir qaýlysyna tirelip tur ma, degen saýaldarǵa jaýap izdedik. Jalpy osynyń barlyǵyn qandaı saıası quraldar arqyly ózgertýge bolady? Mine osy atalǵan jaıttardyń anyq-qanyǵyna jetý úshin osyndaı otyrystar kerek», deıdi qor dırektory.
Onyń aıtýynsha, bılikte de, tipti basqa da qoǵamdyq-saıası kúshterdiń arasynda da jumys tili qandaı desek, olar báribir kóp másele orys tilinde talqylanyp, al qazaq tili shyn máninde resmı sharalardaǵy salttyq túrde ǵana qoldanylatyn sııaqty. Al jumys barysy negizinen orys tilinde órbıtini shyndyq.
Búgin qazaq tiliniń saıası kommýnıkatsııadaǵy roli qandaı degen máseleni kótergen ortalyq aldaǵy ýaqyttarda densaýlyq saqtaý, quqyq organdary jáne basqa da salalardaǵy qazaq tiliniń taralý deńgeıi, shyn mánindegi jaǵdaıyna qatysty máselelerdi talqyǵa salmaq.
