Qazaq tiliniń biriktirýshi til ekenin ózge ult ókilderine jetkize bilý kerek - professor N.Tólenbergenova

ASTANA. 4 mamyr. QazAqparat - Qazaqstan halqyn biriktiretin til - qazaq tili. Osyny ózge ult ókilderine túsindirip, jetkizý kerek. Búgin Astanada ótken «Bir til - bir el - bir taǵdyr» taqyrybyndaǵy «dóńgelek ústelde» QR Prezıdenti janyndaǵy Memlekettik basqarý akademııasynyń «Tilder jáne aýdarma isi» kafedrasynyń professory Nazıgúl Tólenbergenova osy máseleni erekshe atap ótti.

«Bul jumys memlekettik tildi oqytýdyń ádistemelik izdenisterin qajet etedi. Oǵan lıngvıst-ǵalymdar belsene qatysýy tıis», - deıdi N.Tólenbergenova. Onyń aıtýynsha, búginde qazaq tilin akademııalyq oqytýdan góri kásibı turǵyda úıretý kerek. Sonda ózge ult ókilderi memlekettik tildi tez meńgerip kete alady. «Máselen, Astanada ótken bir jıynda ózge ult ókilderi grammatıkadan buryn qazaq tilinde sóıleýdi úırensek degen tilekterin jetkizdi. Bizde han-bılerdiń sóılegen sózderi bar emes pe? Sóıleý qazaqtan qalǵan. Sheshendik ónerimiz de baı. Sony ádistemege túsirip, aýdıtorııaǵa jetkizýge bolady ǵoı. Ózge ult ókilderi osyny suraıdy», - dep atap kórsetti professor.