Qazaq tilinen «Jarqyn bolashaq» olımpıadasyna BQO-dan qatysatyndar belgili boldy
ORAL. QazAqparat - «Jarqyn bolashaq» ІH respýblıkalyq qazaq tili olımpıadasy oblystyq kezeńiniń jeńimpazdary belgili boldy, dep habarlaıdy «QazAqparat» HAA tilshisi.
BQO daryndy balalarǵa arnalǵan qazaq-túrik mamandandyrylǵan mektep-lıtseı-ınternatynyń dırektory Sáken Taldahmetovtiń aıtýynsha, «Bilim - ınnovatsııa» halyqaralyq qoǵamdyq qory memlekettik tildiń mártebesin arttyryp, qoldaný aıasyn keńeıtý maqsatynda 7-11 synyp oqýshylary arasynda atalmysh baıqaýdy uıymdastyryp keledi. Mundaǵy maqsat - qazaqsha sóıleýmen birge memlekettik tilde án salyp, mánerlep oqý, ǵylymı jumystar qorǵaý, týǵan ólkesin tanytý baǵytynda erekshe kózge túsken jetkinshekterge qoldaý kórsetý. Eldiń jarqyn bolashaǵy da osyndaı jastardyń qolynda. Oblystyq kezeńge 130-ǵa jýyq oqýshy qatysyp, baq synady, bul ótken jylǵydan áldeqaıda kóp. 2016 jyly respýblıkalyq kezeńge BQO-dan barǵan toǵyz shákirttiń jeteýi júldeger atanyp, bireýi Qoja Ahmet ıAsaýı atyndaǵy halyqaralyq qazaq-túrik ýnıversıtetiniń grantyn ıelengen bolatyn.
Saıys qorytyndysynda ár baǵyt boıynsha qazaq jáne ózge ult ókilderi arasynan bir-bir jeńimpazdan anyqtaldy. Osylaısha, «Tilshi-ádebıetshiler» atalymy boıynsha Oraldaǵy Á.Moldaǵulova atyndaǵy №38 mektep-lıtseıiniń shákirti Dana Erǵalıqyzy, Aqjaıyq aýdany Krasnoıar mektebinen kelgen Albına Serazıtdınova, «Ánshi bulbuldar» boıynsha Oraldaǵy №20 mektepten Móldir Maratova, jańaqalalyq Negmetolla Eshkaev, «Jazýshylardan» daryndy balalarǵa arnalǵan mamandandyrylǵan S.Seıfýllın atyndaǵy №11 oblystyq mektep-ınternaty kesheninen Alına Alpysbaeva men №35 mektep-lıtseıinen Adel Mýstafına, «Sóz sheberlerinen» Jánibek aýdany H.Halıýllın atyndaǵy mektepten Tórehan Násıev, Qaztalov aýdany Ǵ.Moldashev atyndaǵy mektepten Raıgúl Ǵaısına, «Jas ǵalymdardan» Jańaqala orta mektebinen Shuǵyla Samatova men qazaq-túrik lıtseıiniń shákirti Adam Petrı úzdik shyqty. Jeńimpazdar endi respýblıkalyq olımpıadaǵa qatysady.
«Jarqyn bolashaq» laýreattaryna belgili aqyn, halyqaralyq «Alash» ádebı syılyǵynyń laýreaty Aqushtap Baqtygereeva aq tilegin aıtyp, batasyn berdi.
Aıta keteıik, respýblıkalyq olımpıada sáýir aıynyń alǵashqy onkúndiginde Astana qalasynda ótedi.
