Qazaq tiline dýblıajdalǵan 32-shi Gollıvýd fılmi prokatqa shyqty
Fılm «Bolashaq» korporatıvtik qory jáne «Meloman» kompanııasynyń bastamasymen, «Nur Otan» partııasynyń qoldaýymen «Ózińnen basta» jobasy aıasynda dýblıajdalǵan. Fılm dýblıajynyń demeýshisi – Eýrazııalyq Top (ERG).
«1993 jyldan bastap Elbasy jarlyǵymen «Bolashaq» baǵdarlamasy júzege asyp keledi. Baǵdarlamanyń arqasynda qarapaıym otbasynan shyqqan kóptegen jasqa shet elderdegi aldyńǵy qatarly oqý oryndarynda bilim alýǵa múmkindik jasaldy. Osyndaı aǵylshyn, nemis, frantsýz jáne taǵy da basqa tilderdi meńgergen jastar halqyńa qyzmet etemin deseń aldymen óz ana tilińdi bilip, ulttyq salt-dástúr men mádenıetti boıǵa sińirý kerek ekenin jaqsy túsindi. Sondyqtan da «Bolashaqpen» oqyǵan bir top jastyń basty maqsaty - elge oralǵan soń ártúrli salada qolymyzdan kelgenshe elge qyzmet etý boldy. Bul joba osyndaı ıgi oıdan týdy», – dedi «Nur Otan» partııasy tóraǵasynyń birinshi orynbasary Baýyrjan Baıbek elordada ótken fılmniń tanystyrylymynda.
Gollıvýd fılmderin qazaq tiline dýblıajdaý – bul birinshi kezekte árbir qazaqstandyqtyń qazaq tilindegi sapaly kontentke qol jetkizý quqyǵy. Al Gollıvýdtyń tanymal kıno týyndylary elimizde 2011 jyldan bastap qazaqsha sóıletip kele jatqan «Ózińnen basta» jobasy kommertsııalyq maqsatty kózdemeıdi.
Aıta keteıik, fılmdi dýblıajdaýǵa jobanyń demeýshisi bolyp otyrǵan Eurasian Resources Group-tyń qyzmetkerleri de qatysqan.
«Malefısenta» mıstıkalyq blokbasterinde joba aıasynda Malefısentanyń rólin dybystaýǵa aıryqsha quqyqtar alynǵan. Máselen, Andjelına Djolı qazaqstandyq teatr jáne kıno aktrısasy Gúlnaz Áýesbaıdy óziniń keıipkerin dybystaýǵa jeke bekitti. Qazaq dýblıajynyń rejısseri Nazerke Lespekqyzy. Fılm kastıngine Nur-Sultan, Almaty jáne Qaraǵandy qalalarynan 40-tan astam akterler qatysqan.
2019 jyly qarasha aıynda taǵy bir qazaq tiline dýblıajdalǵan «Muzdy ólke 2» fılminiń tusaýkeseri kútip tur.
«Ózińnen basta» jobasyn aıasynda qazaq tiline barlyǵy 32 gollıvýdtyq týyndy dýblıajdalsa, olardyń ishinde «Kólikter 2», «Kek alýshylar: Altron dəýiri», «Batyl júrek», «Koko qupııasy», «Moana», «Malefısenta», «Aladdın», «Oıynshyqtar hıkaıasy - 4» jáne t.b. fılmder bar. Osy jobanyń arqasynda 100-den astam otandyq akterdiń daýysy «Walt Disney Pictures» daýystyq qoryna jazyldy. Qazaq tili dýblıajda túrik tilinen keıingi ekinshi túrki tili bolsa, «Walt Disney» kompanııasynyń tarıhynda 39-shy orynda.
