Qazaq tiline aýdarylǵan kitaptardy JOO-lardyń oqý protsesine engizý bastaldy

ALMATY. QazAqparat - Qazaq tiline aýdarylǵan 18 oqýlyqtyń biri «Menedjment», «Ekonomıks» kitaptaryn oqý protsesine engizý jumystary bastaldy. Bul týraly Almatyda Óńirlik kommýnıkatsııalar qyzmetiniń alańynda ótken baspasóz máslıhatynda aıtyldy, dep habarlaıdy QazAqparat tilshisi.

Halyq sharýashylyǵy ýnıversıteti Ekonomıka jáne basqarý mektebiniń dekany Samajan Ómirzaqovtyń aıtýynsha, JOO-da menedjment kafedrasynyń ustazdary Rıkkı Grıffınniń «Menedjment» oqýlyǵyn oqý protsesine engizý boıynsha tıptik oqý josparlaryn ázirleýge kirisken.

«Kitapty aýdarý barysynda termınologııaǵa ózgeris engen tustar bar. Sol jaǵy da eskerilip jatyr. Buǵan deıin qoldanyp kelgen kitaptarymyz ben Grıffınniń oqýlyǵy arasyndaǵy ózgeshelikterdi de eskeremiz. Aldaǵy oqý jylynda stýdentter osy oqýlyq boıynsha da bilim ala bastaıdy. Grıffınniń «Menedjment» oqýlyǵy 20 taraýdan turady. Onda menedjmenttiń tórt fýnktsııasy tutas qamtylǵan. Osy oqýlyq negizinde qazir aýdaryla bastaǵan «Strategııalyq menedjment», «Adam resýrstaryn basqarý», «Uıymdyq minez-qulyq» oqýlyqtarynyń teksteri de ázirlenedi. Menedjment mamandyǵy boıynsha bilim alyp jatqan stýdentterdi osyndaı aýqymda oqýlyq materıaldarmen qamtý elimizde alǵash júzege asyrylyp jatyr. Soǵan óte qýanyshtymyz. Qazir menedjment kafedrasynyń ustazdary osy oqýlyq boıynsha vıdeolektsııa túsirý jumystaryna aralasyp jatyr. Demek, keler oqý jylynda stýdentter de, osy mamandyq boıynsha qashyqtan bilim alatyndar da, materıaldarmen tolyq qamtamasyz etiledi degen sóz»,-dedi Samajan Ómirzaqov.

Ál-Farabı atyndaǵy QazUÝ ekonomıka kafedrasynyń meńgerýshisi Gúlnár Sadyhanovanyń aıtýynsha, Gregorı Menkıýdiń «Ekonomıks»  oqýlyǵynsyz ekonomısterdiń kúni qarań syńaıly.

«Ekonomıka mamandyǵy boıynsha bilim alatyn stýdentterdiń de, jalpy osy salada jumys isteıtin mamandardyń da negizgi, basty kitaby sanalady. Onsyz ekonomısterdiń tańy atpaıdy. Qazir osy oqýlyqtyń qazaq tilindegi nusqasyn oqý protsesine engizý jumystary bastaldy. Onymen men basqaratyn kafedra tikeleı aınalysady. Sondaı-aq, vıdeolektsııa túsirý jumystaryna da atsalysa bastadyq. Mysaly, qazaq tilindegi lektsııalardy ázirleý jumysyna men aralassam, orys tilindegi lektsııalardyń redaktory - ekonomıks, makroekonomıka salalary boıynsha jetekshi ǵalymdarymyzdyń biri, barlyǵymyz qurmetteıtin ustazymyz, ekonomıka ǵylymdarynyń doktory, professor Bolat Muhamedıev aınalysyp jatyr», - dedi Gúlnár Sadyhanova.

Avtory: Araılym Joldasbaı