Qazaq tilindegi oqýlyqtarda qateler órip júr - QR BǴM
ASTANA. QazAqparat - Búgin «Nur Otan» partııasy janyndaǵy «Mıras» qoǵamdyq keńesiniń memlekettik tildi oqytý, qazaq tilindegi oqýlyqtar máselesi taqyrybyndaǵy keńeıtilgen otyrysynda QR Bilim jáne ǵylym mınıstri Aslan Sárinjipov oqýlyqtardaǵy kemshilikterdi atady.
«Sońǵy úsh jylda 4 myń oqý ádebıetine bilim berý uıymdarynda qoldanýǵa ruqsat berildi. Onyń ishinde 2 372-si qazaq tilindegi kitaptar»,-dedi mınıstr.
Qazaq tilindegi oqýlyqtardaǵy negizgi kemshilikterge toqtalǵan A. Sárinjipov, mátinniń, teorııalyq materıaldardyń basym bolýy, oqýlyq mazmunynyń oqýshylardyń fýnktsıonaldyq saýattylyǵyn qalyptastyrýǵa baǵyttalmaýy, ıllıýstratsııalar sapasynyń tómendigi sekildi máselelerdi atap ótti. Sonymen qatar oqýlyqtar ǵylymı termınderdiń berilýinde birizdiliktiń saqtalmaýy, mátinderdiń kúrdeliligi, oqýshylardyń jas ereksheligine sáıkes kelmeýi, orys tilindegi sózderdiń aýdarmasyz berilýi nemese durys aýdarylmaýy, qazaqtyń kónergen sózderiniń durys qoldanylmaýy, jalpy sóılemniń durys qurylmaýy sekildi kemshilikter baıqalǵan.
Mınıstrdiń sózine qaraǵanda, qazirgi ýaqytta jańa tıpti oqýlyqtarǵa qoıylatyn talaptardyń jobasy jasalǵan.
