Qazaq tilindegi mýltfılmder kınoteatrlarda nege yńǵaıly ýaqytqa qoıylmaıdy
ASTANA. QazAqparat - Qazaq tilindegi anımatsııalyq fılmder kınoteatrlarda nelikten yńǵaıly ýaqytqa qoıylmaıdy? Jalpy, kınoteatrlardy qazaq tilindegi týyndylardy kóbirek kórsetýge mindetteýge bola ma? Kınoteatr dálizinde ulttyq kınoónimderdiń jarnamasy nege qoıylmaı jatyr? Bul suraqqa búgin Mádenıet jáne sport mınıstrliginiń baspasóz ortalyǵynda ótken brıfıngte Sh. Aımanov atyndaǵy «Qazaqfılm» kınostýdııasynyń baspasóz hatshysy Aınur Isaeva jaýap berdi, dep habarlaıdy QazAqparat tilshisi.
«Jalpy, bul áńgime kópten beri aıtylyp kele jatyr. Atalmysh másele bizdiń bir osal tusymyz dese de bolady. Alaıda, prokat máselesi, belgili bir kıno seanstarynyń kóp nemese az bolýy, qaı tilde nemese qaı ýaqytta kórsetilýi - ókinishke qaraı, kınostýdııaǵa táýeldi emes. Atalmysh máseleni Mádenıet jáne sport mınıstrligi de sheshe almaıdy. Óıtkeni, kınoprokat júıesi tolyǵymen jekemenshik kompanııalardyń qolynda. Sondyqtan, olarǵa bizdiń sózimiz ótpeıdi. Biz, máselen, «Kúltegin» anımatsııasy prokatqa shyǵardan bir aı buryn kınoteatrlardyń prokat kestesine engizip, olarmen arnaıy kelisimshart jasaımyz. Ol áýeli alǵashqy eki aptaǵa jasalady. Eger ol fılmge kóp adam baratyn bolsa, kelisimshartty ary qaraı uzartamyz», - deıdi Aınur Isaeva.
Onyń aıtýynsha, shyntýaıtyna kelgende kınoteatrlar keıbir fılmderdi óte yńǵaısyz ýaqytqa qoıady.
«Sonymen birge, olar qazaq tilindegi týyndylardy óte az qoıady. Biz «Kınopark» júıesiniń pıar-dırektory Erlan Buharbaevpen habarlasyp, osy máseleni sheshý jóninde talaı kelissóz júrgizgenbiz. Ol kisilerdiń aıtýynsha, qazaq kórermenderi kınoteatrǵa barmaıdy. Birinshi qazaq jáne orys tilindegi nusqasyn qatar qoıady eken de, sol kúni qaı tilge kórermen kóp kelse, sol tildegi nusqasyn kóptep qoıady eken. Biz Erlan myrzaǵa ózimizdiń ýájimizdi aıtyp túsindire almadyq. Áıtpese, bizdiń resmı áleýmettik jelidegi paraqshalarymyzǵa, telefonmen de talaı kisiler habarlasyp, renishin aıtyp jatyr. Kórermender jaqsy týyndylar shyǵyp jatqanymen, kınoeatrlardan tappaı jatqanyn aıtady» dep jatyr», - deıdi ol.
Aınur Isaevanyń aıtýyna qaraǵanda, bul máseleni alda shyqqaly jatqan kınematografııa týraly zań retteýi tıis.
«Ol zań shyqsa, osy máseleniń bári túbegeıli joıylady dep esepteımiz. Óıtkeni, ol zańnyń birneshe bóliminde ulttyq deńgeıdegi týyndylarǵa jalpyulttyq prokat mindetteledi. Onyń praım-taımǵa qoıylýy da mindetteletin bolady. Sondyqtan, bul qazirgi ǵana másele. Zań shyqsa, másele sheshilip, qazaq kórermeni ózine qajetti týyndyny qazaq tilinde kóre alady degenge senemin», - deıdi Aınur Isaeva.
Óz kezeginde «Qazaqfılm» kınostýdııasynyń anımatsııalyq kıno shyǵarmashylyq birlestiginiń basshysy Adaı Ábdildá qazaqsha mýltfılmder men fılmderge suranysty tek kórermenniń esebinen arttyrýǵa bolatynyn aıtady.
«Áleýmettik jeli bar. Suraý da, talap etý de kerek. Men bilem, kórermen qazaq tildi kontentti kórgisi keledi, demek ony talap etý kerek. Kınoprokatshylar qazaqtildi kórermennen suranys joq deıdi. Biz bolsaq, bar deımiz. Tek kórermen kınoprokatshylardan týyndylardy qazaq tilinde talap etýi tıis. Facebook-ten maǵan kúnine bes hat keledi. Bári de qazaq tilindegi anımatsııanyń yńǵaısyz ýaqytta nemese negizinen orys tilinde kórsetilip jatqanyn aıtady. «Kınematografııa týraly» zańda damyǵan elderdegideı bul másele shegelenýi tıis. Máselen, Qytaıda sheteldik fılmderdiń úlesi bar-joǵy 30 paıyz ǵana. Qalǵany - otandyq ónimder. Olar kóbinese otandyq ónimderge basymdyq beredi», - deıdi Adaı Ábdildá.
