Qazaq tilindegi latyn álipbıi jyl sońyna deıin daıyn bolady

ASTANA. QazAqparat - Qazaq tilin latyn álipbıine kóshirý jónindegi arnaıy komıssııa  qurylyp, jumys istep jatyr. Bul týraly búgin Úkimet úıinde «100 naqty qadam» Ult josparynyń áleýmettik jáne bilim salalarynda júzege asyrylýyna arnalǵan brıfıngte QR Bilim jáne ǵylym mınıstri Erlan Saǵadıev málim etti, dep habarlaıdy QazAqparat.

«Bul mańyzdy joba bolǵandyqtan barynsha abaı bolý qajet, qatelikterge boı aldyrmaý kerek. Aǵymdaǵy jyly jasalýy tıisti másele - bul kóńilge qonymdy barlyq áripti qabyldaý. Birneshe nusqa ázirlep, ony talqylap, álipbıdi qabyldaý qajet. Sodan keıin latynǵa kóshý jumystarynyń josparyn túzý kerek. Bul másele boıynsha arnaıy komıssııa qurylyp jumys istep jatyr», - dedi mınıstr BAQ ókilderiniń saýalyna oraı.

Aıta keterligi, Memleket basshysy Nursultan Nazarbaev  2012 jylǵy jeltoqsan aıynda jarııa etken «Qazaqstan-2050» strategııasynda 2025 jyldan bastap latyn álipbıine kóshýge kirisýimiz kerektigin málimdegen bolatyn. Odan keıin aǵymdaǵy jyldyń sáýirinde jaryq kórgen «Bolashaqqa baǵdar: rýhanı jańǵyrý» atty baǵdarlamalyq maqalasynda aldaǵy jyldarda myqtap qolǵa alý qajet bolatyn birneshe jobanynyń ishinde qazaq tilin birtindep latyn álipbıine kóshirý jumystaryn bastaý kerektigin kótergen edi.

«2025 jylǵa qaraı is qaǵazdaryn, merzimdi baspasózdi, oqýlyqtardy, bárin de latyn álipbıimen basyp shyǵara bastaýǵa tıispiz.  Ol kezeń de taıap qaldy, sondyqtan biz ýaqyt uttyrmaı, bul jumysty osy bastan qolǵa alýymyz kerek. Biz osynaý aýqymdy jumysty bastaýǵa qajetti daıyndyq jumystaryna qazirden kirisemiz. Úkimet qazaq tilin latyn álipbıine kóshirýdiń naqty kestesin jasaýy kerek», - dep atap ótken edi Elbasy.