Qazaq tilindegi Qytaı radıosy 18 saǵat habar taratpaqshy
ASTANA. QazAqparat - Qytaıdyń Ortalyq halyq radıosyndaǵy qazaq tilindegi habar taratyla bastaǵanyna bıyl 40 jyldan asty. Alǵash ret aspan asty elindegi qandastarymyz ana tilindegi habardy 1971 jyldyń mamyrynda estigen edi.
Sol ýaqyttan beri bul radıo alys-jaqyn sheteldegi kóptegen tyńdarmandardyń kóńilinen shyǵyp keledi. Qytaıdaǵy Ortalyq halyq radıostansasy bes ulttyń tilinde sóıleıdi. Sonyń biri - qazaqsha. «Áýe tolqynynda ortalyq halyq radıostansasy». Osydan 43 jyl buryn dál osy sózdi Beıjińde tuńǵysh ret Nurǵaısha Shámelqyzy men Qabykesh Salıhuly aıtqan. Alǵashynda jarty saǵat qana habar taratqan qazaq radıosy endi áýe tolqynyna 18 saǵat shyqpaq, dep jazady 24.kz.
«Bıyldan bastap bizdiń qazaq radıomyzda sekirmeli damý jaryqqa shyǵyp otyr. Bul sekirmeli damý deıtinimiz ol 3 saǵattan 18 saǵatqa uzaryp, arnaýly efır bolmaqshy», - deıdi Qytaı ortalyq radıostansasy, Ulttar radıo ortalyǵy basshysynyń orynbasary Qanatbek Jumabaı.
Buǵan deıin qazaq bóliminde 20 adam bolsa, búginde 34 adam jumys isteıdi. Redaktsııaǵa negizinen til fakýltetin bitirgen jas mamandardy alǵan. Olar Beıjińde birshama is-tájirıbeden ótken soń Úrimshidegi bólimshege jiberiledi. Jastar áýe tolqynyn qyzyqty habarlarman toltyrady degen úmitte.
Radıo tolqyny alys-jaqyn shetelderdiń bárin qamtıdy. Qazir 34 memlekette tyńdaýǵa bolady.
