Qazaq tilindegi koreı ertegileri kishkentaı oqyrmandarǵa jol tartpaq
ASTANA. QazAqparat - 22 tamyz kúni Astanadaǵy Koreı elshiligine qarasty «Koreı mádenıeti» ortalyǵynda «Folıant» baspasy basyp shyǵarǵan «Koreı ertegileri» kitabynyń tusaýkeseri bolady. Koreı tilinen qazaqshaǵa alǵash aýdarylyp, oqyrmanǵa usynylyp otyrǵan kitaptyń avtory esimi elimizge tanymal bola bastaǵan shyǵystanýshy, aýdarmashy, jergilikti jáne memlekettik basqarý salasynyń mamany Dastan Aqash.
Sońǵy kezderi baıqap júrgenimizdeı, Qazaqstan men Koreı eliniń arasyndaǵy mádenı ekonomıkalyq baılanystar ýaqyt ótken saıyn jańa deńgeıge kóterilip kele jatyr. Osy oraıda eki eldiń mádenı ómirindegi uqsastyqtar jıi aıtylýda. Tamyry tereńde jatqan bul uqsastyqtar kitapqa engen koreı ertegileriniń árqaısysynan aıqyn ańǵarylady.
Koreı eliniń eńbekqorlyǵyn, adaldyǵyn, meıirim-qaıyrylymdyǵyn, izetti de, izgi qasıetterin arqaý etken ertegilerdiń tili tartymdy, mazmuny baı. Bir sózben aıtqanda, balalar sanasyna laıyqty tilmen aýdarylǵan kitaptaǵy 10 erteginiń oqyrmandy oılantyp-tolǵantary, beı-jáı qaldyrmasy anyq. Kitap búldirshin qazaq balalaryna ǵana emes, koreı tilin úırenýshi stýdent jastarǵa, koreı mádenıeti men ekonomıkasyna qyzyǵýshylarǵa arnalǵan.
Jalpy balalar ádebıeti álem halyqtarynyń barlyǵyna ortaq qazyna. Sol qazynadan urpaqty habardar etý el erteńin oılaǵandyqtyń belgisi. «Folıant» baspasynyń osy rettegi kishkentaı oqyrmandarǵa koreı halqynyń ertegilerin qyzyqty kórkem sýrettermen usynýy - qýanarlyq ta, quptarlyq jaı. Jaqsylyqtyń kóshbasshysy bolǵan baspa óziniń jaqsy isterin aldaǵy ýaqyttarda da jalǵastyrmaq oıda. Kishkentaı oqyrmandar jýyq arada «Koreı ertegileriniń» ekinshi kitabymen de qaýyshatyn bolady.
