Qazaq tilindegi balalar ádebıeti syn kótermeıdi - Senator Kóbenov
Bul jaıynda búgin QR Parlamenti Senatynyń jalpy otyrysynda depýtat Manap Kóbenov aıtty, dep habarlaıdy QazAqparat.
«Qazaqstan Respýblıkasynyń keıbir zańnamalyq aktilerine mádenıet máseleleri boıynsha ózgerister men tolyqtyrýlar engizý týraly» QR zańy jobasyn talqylaý barysynda senator zań jobasy aıasynda mádenıet salasyndaǵy ýákiletti organǵa qoǵamdyq mańyzy bar ádebıetti satyp alý jónindegi jumysty uıymdastyrý quzireti beriletindigin atap ótti.
«Búgingi kúni balalarǵa arnalǵan qazaq tilindegi ádebıettiń jaǵdaıy syn kótermeıdi dep aıtýǵa bolady. Dúken sórelerinen memlekettik tildegi balalarǵa arnalǵan kitaptardy da tappaısyń. Barlyq dúkenderde kórshiniń, basqa elder baspalarynyń kózdiń jaýyn alatyn ádemi bezendirilgen kitaptary qoıylǵan. Erteń sońymyzdan kitap oqymaǵan urpaq qaldyrmaý úshin bul máseleni búgin sheshken jón dep sanaımyn. Suraǵym, qyzyqty, maǵynaly kitaptardyń joqtyǵyn qalaı túsinýge bolady? Balalarǵa arnalǵan kitaptar jaǵdaıy qashan túzeledi?», - dep surady senator QR Mádenıet jáne sport mınıstri Arystanbek Muhamedıulynan.
Óz kezeginde mınıstr elimizde qazaq tilindegi balalarǵa arnalǵan shyǵarmalardyń tym az ekendigin moıyndady.
«Osy zań arqyly arnaıy shyǵarmalarǵa tapsyrys berý múmkinshiligin alatyn bolamyz. Zań qabyldanǵannan keıin balalarǵa arnalǵan jeke shyǵarmalarǵa tapsyrys bere alamyz. Degenmen qazirdiń ózinde «Atamura», «Arýna», «Almaty kitap» syndy baspalalardyń balalarǵa arnalǵan qazaq tilindegi ádemi kitaptary bar», - dedi Muhamedıuly.
