Qazaq tilindegi alǵashqy ESET NOD32 antıvırýsy satylymǵa shyǵaryldy
ALMATY. Sáýirdiń 20-y. QazAqparat /Ádilet Musahaev/ - Antıvırýsty baǵdarlamalyq qamsyzdandyrý jáne kompıýterlik qaýipsizdik salasyndaǵy sheshimderdi ázirleýshi halyqaralyq ESET kompanııasy qazaq tilindegi ESET NOD32 antıvırýsyn satylymǵa shyǵardy,
dep habarlaıdy QazAqparat.
Búgingi kúni Qazaqstan naryǵy ESET bıznesi úshin asa joǵary basymdyqqa ıe bolýda. Ana tilimizdegi antıvırýstyq ónimderdiń qoljetimdiligi - buqaralyq qoldanýshylar arasynda ónimniń tabysqa ıe bolýynyń kepili. Búgingi kúni ESET NOD32 sheshimderi osy salada qazaq tilindegi jergiliktendirilgen jalǵyz antıvırýstyq sheshim bolyp otyr.
«2009 jyly ónimderdi jergiliktendirý boıynsha jumys bastalyp, Almaty qalasyndaǵy ESET aımaqtyq keńsesiniń qyzmetkerlerimen tyǵyz baılanys negizinde júrgizildi. Qazirgi tańda ESET NOD32 korporatıvti nusqasy men úıde qoldanýshylarǵa arnalǵan ónimder qazaq tilinde shyǵyp otyr. ESET sheshimderiniń qazaq tilindegi satylymy «1S», MONT, RRC resmı dıstrıbıýtorlary arqyly elektrondy lıtsenzııalar men qoraptaǵy nusqalar túrinde júzege asyrylmaq», deıdi ESET-tiń Qazaqstandaǵy aımaqtyq keńsesin basqarýshy Jánibek Shutbaev.
Sondaı-aq ol sheshimderdi qazaq tiline jergiliktendirý ESET-tiń aımaqtaǵy ornyn bekitýdi kózdeıtinin jetkizdi. «Búgingi kúni ESET-tiń Qazaqstandaǵy tutynýshylary iri memlekettik jáne kommertsııalyq uıymdar bolyp tabylady, sonyń ishinde «Qazposhta» AQ, «Eýrazııalyq Bank» AQ, «Hoým Kredıt Bank» AQ, «Mobaıl Telekom-Servıs» bar. Osyndaı memlekettik tildi qoldaıtyn uıymdar Qazaqstandaǵy antıvırýs naryǵynda ESET NOD32 sheshimderiniń úlesin edáýir arttyrýǵa múmkindik beredi dep oılaımyn», deıdi J. Shutbaev.
