Qazaq tilindegi 2 myńnan astam salalyq termın túrlishe qoldanylyp júr - sarapshy

ASTANA. QazAqparat - Qazaq tilindegi 2 myńnan astam salalyq termınder túrlishe qoldanylyp júr. Bul týraly «Medıtsınalyq termınderdi birizdendirýdiń normatıvtik-lıngvıstıkalyq negizderi» taqyrybynda ótken dóńgelek ústel barysynda «Qazaqstan pedagogıkalyq ǵylymdar akademııasy» qoǵamdyq birlestigi basqarmasynyń tóraǵasy Asqarbek Qusaıynov habarlady.

«Búgin termınologııa salasyndaǵy ózekti máseleler talqylanýda. Birizdendirý - salalyq termınderdi qalyptastyrýda kúrdeli máselelerdiń biri. Bul jaǵynan sońǵy úsh jylda óte aýqymdy jumystar júrgizildi. Tilderdi damytý jáne qoǵamdyq-saıası jumystar komıtetiniń tapsyrysy boıynsha Pedagogıkalyq ǵylymdar akademııasy 30 tomdyq salalyq termınologııalyq sózdikter serııasyn daıyndady. Termınderdi birizdendirý týraly másele qozǵalǵanda, olardyń biri, mysaly, medıtsına termıni hımııada, bıologııada, ekologııada ushyrasatynyn eskerýimiz qajet. Onyń maǵynasy barlyq osy salalarda birdeı bolýy tıis. Biz ár salada ár túrli qoldanylatyn 2 myńnan astam termındi taptyq. Keńese kele, biz bul máseleni tıisti sala mamandarymen birge talqylaý qajet dep sheshtik», - dedi A. Qusaıynov. Sondaı-aq ol qazirde maquldanǵan termınderdi bekitý jumystary júrgizilip jatqanyn atap ótti. «Termınologııalyq qor quryldy. Negiz bar. 250 myńnan astam termın maquldandy. Qazir olardy bekitý boıynsha úlken jumys júrgizilýde. Sebebi biz jańylyspaý úshin ártúrlilikten arylýymyz qajet», - dep sózin túıindedi A. Qusaıynov. Qazaqstan Respýblıkasynda Tilderdi damytý men qoldanýdyń 2011-2020 jyldarǵa arnalǵan memlekettik baǵdarlamasynda aıtylǵan basty mindetterdiń biri termınologııalyq leksıkany birizdendirý jáne qazaq tilindegi termınderdiń rettelgen qoryn qurý bolyp tabylady.