«Qazaq tilindegi 100 jańa oqýlyq» jobasy aıasynda 77 kitap aýdaryldy – Raýan Kenjehanuly

NUR-SULTAN. QazAqparat – 2017 jyldyń sáýir aıynan beri 77 oqýlyq qazaq tiline aýdarylyp, elimizdegi 132 joǵary oqý oryndarynyń kitaphanalaryna jetkizildi. Bul týraly elorda ákimdiginde ótken «Qazaq tilindegi 100 jańa oqýlyq» jobasy aıasyndaǵy Ulttyq aýdarma bıýrosynyń jumysy týraly brıfıngte aıtyldy, dep habarlaıdy QazAqparat tilshisi.

«Qazaq tilindegi 100 jańa oqýlyq» jobasynyń maqsaty – dúnıe júzindegi eń ilgeri joǵarý oqý oryndarynyń baǵdarlamalaryna kirgen, álem boıynsha bilim berý salasynda keńinen qoldanylatyn oqýlyqtardy qazaq tiline aýdaryp, bizdiń stýdentterge jetkizý. Jobany iske asyrmas buryn bizdiń eldegi joǵary oqý ornynan qandaı oqýlyqtardy aýdarý kerektigi týraly usynys suradyq. Jaýap retinde 800 kitaptyń tizimi keldi. Arnaıy jumys toby negizgi talaptardy anyqtap, sonyń negizinde jyl saıyn 30 oqýlyqtan bekitip berip otyrdy. Qazirgi ýaqytta «Rýhanı jańǵyrý» baǵdarlamasy qolǵa alynǵan 2017 jyldyń sáýir aıynan beri 77 oqýlyqty aýdaryp, basyp shyǵaryp, elimizdegi 132 joǵary oqý oryndarynyń kitaphanalaryna jetkizip berdik. Barlyq memlekettik jáne jeke menshik oqý oryndaryn qamtydyq. Taǵy 23 oqýlyq aýdarylyp boldy. Olar baspaǵa daıyndalyp jatyr. Jyl sońyna deıin ol oqýlyqtar da joǵary oqý oryndaryna jetkizilip, osy jyly bul jobanyń qorytyndysy shyǵarylady», - deıdi «Ulttyq aýdarma bıýrosy» qoǵamdyq qorynyń jetekshisi Raýan Kenjehanuly.

Onyń aıtýynsha, atalǵan oqýlyqtardy aýdarýǵa, daıyndaýǵa elimizdegi barlyq ulttyq ýnıversıtet mamandary keńinen qatysqan.

«Jalpy alǵanda 300-ge tarta ǵalymdar, redaktorlar, aýdarmashylar oqýlyqtardy aǵylshyn tilinen tikeleı qazaq tiline aýdardy. Aýdarmashylar til biletin ǵana emes, sol pán boıynsha bilimi bar mamandar boldy. Tiliniń jatyq bolýy úshin ǵylymı, ádebı redaktorlar eńbek etti. Bul oqýlyqtar joǵary oqý oryndarynyń kafedralarynda talqylaýdan ótti. Osylaısha birneshe satydan turatyn sapany qamtamasyz etetin júıe qalyptasty», - deıdi ol.