Qazaq tilinde zaman aǵymyna saı jazylǵan pesalar qajet - teatr ártisi
ASTANA. 26 qarasha. QazAqparat /Gúlmıra Álıakparova/ - Ana tilimizde zaman aǵymyna oraı jazylǵan pesalardyń azdyǵynan aýdarma jáne burynǵy keńes ýaqytyndaǵy týyndylardy sahnalaýǵa májbúrmiz, dedi búgin ótken baspasóz máslıhatynda Astanadaǵy Q.Qýanyshbaev atyndaǵy Qazaq mýzykalyq drama teatrynyń ártisi Zıpagúl Qarına.
Baspasóz máslıhaty Qazaqstan Prezıdenti N.Nazarbaevtyń «Jańa on jyldyq - jańa ekonomıkalyq órleý - Qazaqstannyń jańa múmkindikteri» atty el halqyna arnaǵan Joldaýyn kópshilikke nasıhatatý maqsatynda «Birge bol» qoǵamdyq birlestigi (QB) respýblıka boıynsha ótkizgen is-sharalardyń nátıjelerine arnaldy.
QB qolǵa alǵan joba aıasynda ústimizdegi jyldyń tamyz-qarasha aılarynda Astana, Almaty, Pavlodar, Shymkent, Atyraý jáne Aqtóbede el mádenıetiniń jetistikteri men túıitkilderine arnalǵan dóńgelek ústelder, semınarlar ótkizdi, sondaı-aq buqaralyq sport pen adamı qundylyqtardyń rólin arttyrý maqsatynda otbasylyq baıqaýlar, sporttyq jarystar keshenin uıymdastyrdy.
Z.Qarınanyń aıtýynsha, Astanada murajaılar, kitaphanalar men teatr qyzmetkerleriniń qatysýymen ótken dóńgelek ústel barysynda búgingi kúni qordalanǵan birqatar problemalar kóterilip, usynystar QR Mádenıet mınıstrligine joldandy. Ol taqyryptardan teatr sahnasyndaǵy máseleler tys qalmady.
Z.Qarınanyń sózine qaraǵanda, Q.Qýanyshbaev atyndaǵy Qazaq mýzykalyq drama teatrynyń búgingi kúngi nazy - «elorda teatry» ataýyna sáıkes keletin ǵımaratqa qol jetkizý. Onymen birge, teatr ártisterine qazaq tilinde jazylǵan pesalardyń joqtyǵynan ózge tilderden, ásirese orysshadan aýdarylǵan týyndylardy qoıýǵa týra keledi. Al zaman aǵymyna saı shyǵarmalardyń jazylmaýynan búgingi kórermen Keńes ýaqytynda jazylǵan dúnıelermen tynystaýǵa májbúr.
«Bizde búgingi kórermenniń suranysyna jaýap beretin týyndylar dúnıege kelýi kerek. Onymen birge, pesalar sahnaǵa beıimdelip jazylýy tıis. Sebebi oqý úshin jazylǵan kez-kelgen shyǵarma sahnalaýǵa kelmeıdi. Mysalǵa, Shekspır ózi ártis, ózi rejısser bolǵandyqtan ol pesalardy sahnanyń búkil múmkindikterin eskere otyryp jazǵan», - deıdi ártis.
