Qazaq tilinde táýlik boıy habar taratatyn telearna Qazaqstanda sandyq júıe engizilgende júzege asýy múmkin - Mádenıet mınıstri
ASTANA. Jeltoqsannyń 21-i. QazAqparat /Qanat Mámetqazyuly/ - Qazaq tilinde táýlik boıy habar taratatyn telearna Qazaqstanda sandyq júıe engizilgende baryp júzege asýy múmkin.
Búgin QR Parlamenti Májilisinde ótken Úkimet saǵatynda depýtattar saýalyna jaýap bergen Mádenıet jáne aqparat mınıstri Muhtar Qul-Muhammed osylaı málim etti, dep habarlaıdy QazAqparat.
«24 saǵat tolyq qazaq tilinde habar taratatyn úsh telearna týraly baspasózde birneshe márte jazyldy. Degenmen, men óz basym eshqashan kelesi jyly osyndaı úsh telearna ashylady, dep aıtqan emespin. Jalpy, bundaı telearna Qazaqstanda sandyq telearna júıesine kóshý júzege asyrylǵanda ǵana ashylýy múmkin. Al onyń qaı merzimde, qashan ashylatynyn ýaqyt kórsetedi. Biraq, bundaı arnalardyń ashylatyndyǵynda esh kúmán bolmaýy kerek», dedi M. Qul-Muhammed.
Mınıstrdiń aıtýynsha, Qazaqstandaǵy respýblıkalyq jelilikte 10 arnany kórsetýge múmkindik bar bolsa, sandyq arnalar iske qosylǵanda olardyń árqaısysynyń jıiligine taǵy 7-8 telearna ashýǵa múmkindik týady. «Demek, sandyq júıe arqyly qazaqstandyq kórermenge 50-60 telearnany tamashalaýǵa deıin múmkindik bolady. Qazir osy baǵyttaǵy tujyrymdama jasalý ústinde. Bul tujyrymdama ázir bolǵannan soń ony Úkimet bekitedi. Sodan keıin baryp, tájirıbe júzinde eki-úsh óńirde 2010 jyldyń ekinshi jartysynan nemese 2011 jyly kóshirýdi josparlap otyrmyz», dedi mınıstr. Onyń aıtýynsha, sandyq telearnaǵa kóshý 1-2 jyl emes, 4-5 jyldyń merziminde júzege asatyn úderis.
