Qazaq tilinde sóılep, án salý baqyt – Tamara Kafarova
ORAL. QazAqparat – Qazaq tilinde sóılep, án salý qandaı baqyt deseńizshi! Bul týraly Jánibek aýdandyq mádenıet úıiniń ádiskeri, «Jánibek sazy» halyqtyq folklorlyq ansambliniń múshesi, ulty ázirbaıjan Tamara Kafarova málim etti, dep habarlaıdy QazAqparat tilshisi.
Onyń aıtýynsha, ákesi Djýrýsh Kasýmov pen anasy Djeıran Kafarova Baký qalasynda týyp-ósken.
1959 jyly otaý tigip, bes jyldan keıin jastyq yntamen eńbek etemiz dep, Batys Qazaqstan oblysy Jańaqala aýdany Másteksaı aýylyna kóship keledi.
-Ata-anamdy sol aýylda turatyn soǵys ardageri Qýanysh Ótegenov pen zaıyby Jańyl baýyryna tartyp, bastapqyda sol kisilerdiń bala-kelinderimen birge ómir súrgen eken, keıin enshilerin berip, bólek shyǵarǵan. Sondyqtan bolar, rýymyzdy surasa, Qýanysh atanyń rýymen, Qalqaman Tana deıtinbiz. Qazaq halqynyń baýyrmaldyǵynyń bir dáleli ǵoı bul da. Keıin apamnan bastap bárimiz de osy qazaq jerinde ómir esigin ashtyq. Ata-anamyz sekildi biz de qazaq tilinde erkin sóıleımiz. Keıin Fýrmanov (Jalpaqtal) aýdanyna qonys aýdardyq, - deıdi Tamara Djýrýshqyzy.
-Uzaq ýaqyt boıy mádenıet salasynda jemisti qyzmet atqaryp kelesiz, onyń syry nede dep oılaısyz?
-Jasymnan ózimniń tabıǵatyma jaqyn mamandyqty tańdadym, ákem án salatyn, onyń da áseri shyǵar. Áıteýir 38 jyl boıy mádenıet salasynda eńbek etip kelemin. Jalpaqtal sahnasynda talaı án saldym. 2005 jyldan beri Jánibek aýdanyndamyn. Osy eki aýdandaǵy áriptesterimniń qoldaýymen ótken jyly «Eńbek dańqy» tósbelgisimen marapattaldym. Budan bes jyl buryn elordamyzdaǵy Beıbitshilik jáne kelisim saraıynda ótken Qazaqstan halqy Assambleıasynyń HHІV sessııasyna qatystym. Elimizdiń ár jerinen kelgen san ult ókilderimen birge bas qosyp, pikirlesip, bir jasap qaldyq. Ózimizge degen qurmetti sezine tústim. Biz de óz tarapymyzdan Qazaq eliniń órkendeýi úshin ár salada talmaı eńbek etip, óz úlesimizdi qosa berýimiz kerek dep sanaımyn.
-Qazaq tilinde án salý baqyt shyǵar?
-Oǵan sóz bar ma! Qazaqstanda turatyn ózge ult ókilderi qazaq tilin meńgerýi kerek dep esepteımin. Qazaq jerinde turyp, qazaq tilinde sóılep, án salǵanyma maqtanamyn. El-jurttyń alǵys-qoshemetine bólenýdiń ózi bir baqyt qoı.
-Qazaqtyń kelini retinde óz mindetimdi qalaı atqaryp júrmin dep oılaısyz, qyzyńyzdyń bolashaqta kim bolǵanyn qalar edińiz?
-Qazaqtyń qara shańyraǵynyń, Qoja rýynan taraıtyn bir otbasynyń úlken kelinimin. Kelin retinde ózime júktelgen mindet-boryshty barynsha atqaryp júrmin. Eń bastysy, otbasynda tatýlyq pen syılastyq saltanat qursa, bárine qolymyz jetedi dep oılaımyn. Joldasym Nurbolat Álibekov ekeýmiz Rıza atty qyzymyzdy tárbıeleýdemiz. Qyzymyz mýzyka mektebinde dombyra synybynda oqıdy. Bı úıirmesine de qatysyp júr. Bolashaqta Rızamyzdyń dombyrashy bolǵanyn qalaımyn.
Eske sala keteıik, budan buryn áskerı qyzmetshiniń tatýlyq, birlik bizdiń basty baılyǵymyz dep aıtqanyn jazǵan bolatynbyz.
