Qazaq tilinde kolledj ben JOO-ǵa arnalǵan ádebıet jetkilikti emes – mınıstr

NUR-SULTAN. QazAqparat – Byltyr orta bilim berý mekemelerindegi kitaphanalarǵa 2 mln-nan astam kórkem ádebıet satyp alyndy. Bul týraly Bilim jáne ǵylym mınıstri Ashat Aımaǵambetov málim etti, dep habarlaıdy QazAqparat tilshisi.

«Memlekettik tildi jetildirý máselesi ol týraly kontentpen de baılanysty. Ásirese kolledj jáne joǵarǵy oqý oryndaryn alsaq, qazaq tiline qatysty kontentke qatysty kemshilik kóp. Jetkilikti deńgeıde ádebıet joq. Osyǵan baılanysty bilim týraly ulttyq jobada joǵaryda atalǵan máseleni bólek qarastyryp otyrmyz. Atap aıtqanda, álemdik deńgeıdegi shet tilderindegi ádebıetterdi qazaq tiline aýdaryp, oqý barysynda qoldaný kerek. Bul jumysqa til komıteti kiristi, ol úshin qarjy qarastyrylǵan. Sonymen qatar búginde otandyq ǵalymdar kolledj jáne JOO arnalǵan qazaq tilindegi oqýlyqtar jazyp jatyr. Ásirese temir-tersektiń tilin qazaqshalaý asa mańyzdy», - dedi Ashat Aımaǵambetov «Memlekettik tildi ǵylym tiline aınaldyrý» atty dóńgelek ústel barysynda.

Sondaı-aq, mınıstr balalardy kitap oqýǵa baýlıtyn arnaıy baǵdarlamanyń júzege asyp jatqanyn aıtty.

«2021 jyly biz mektep kitaphalaryna 2 mln-nan astam kórkem ádebıet satyp aldyq. Balalar mektep kitaphanasyna barmaıdy dep jatady. Eger kitaphanada jetkilikti deńgeıde qyzyqty ári zamanaýı kitaptar bolmasa, árıne balalardy tartý ońaı emes. Qazaq tilin ǵylym tiline aınaldyrýǵa qatysty kelesi másele – termınologııa. Termınderge qatysty basty maqsat – birizdiliktiń bolýy. Sebebi keıbir termınderdi ár jer ártúrli aýdaryp júr. Osy olqylyqty joıý kerek. Bul maqsatta bizdiń komıtet jumysty bastap ketti. Termınologııaǵa qatysty usynystaryńyz bolsa, qaraýǵa ázirmiz», - deıdi ol.

Buǵan deıin vedomstvo basshysy qazaq synybynda oqıtyn oqýshylardyń máselesin qozǵaǵan edi.