Qazaq tilinde Qazaqstannyń dıplomatııalyq qyzmetine arnalǵan alǵashqy oqýlyq jaryq kórdi
ASTANA. Qazannyń 12-si. QazAqparat /Arman Asqarov/ - Búgin Lev Gýmılev atyndaǵy Eýrazııa ulttyq ýnıversıtetinde elimizdiń dıplomatııalyq isine eńbegi sińgen qaıratker, Názir Tórequluly atyndaǵy qoǵamdyq qordyń tóraǵasy, professor-ǵalym Saılaý Batyrshaulynyń «Dıplomatııalyq qyzmet jáne halyqaralyq qatynastar» atty oqýlyǵynyń tanystyrylymy ótti.
Memlekettik tilde alǵash ret jaryq kórip otyrǵan atalǵan eńbekte avtor qazaq dıpomatııasynyń qyr-syryn barynsha ashýdy maqsat tutqan. Kitapta kelissózder júrgizý tásilderi, elshi taǵaıyndaý, sheteldik elshilerdi qabyldaý, kelisim-sharttar jasasý dástúrleri týraly qyzyqty málimetter bar. Oqýlyqtyń mańyzdy bóligin Qazaq handyǵynyń dıplomatııasyna qatysty izdenister men kózqarastar quraıdy. Atap aıtqanda, qazaq halqynyń Qasym, Esim, Táýke, Abylaı syndy dańqty tulǵalardyń memlekettilikti nyǵaıtý, sheteldik ekspansııaǵa qarsy turý, týǵan jeriniń tutastyǵyn saqtaý jolynda júrgizgen sarabdal saıasaty keńinen baıandalady. Qazaqtyń áıgili úsh bıi - Tóle bı, Qazybek bı jáne Áıteke bıdiń ómiri men qyzmetine, danalyq ári kemeńgerlik qasıetterine erekshe kóńil bólinedi. Sondaı-aq Alash avtonomııasynyń tarıhy men taǵdyryna qatysty derekter oqýlyqtyń mazmundyq qundylyǵyn arttyra túsedi. Keńes dáýirindegi Qazaqstannyń dıplomatııasy týraly oı qozǵaı otyryp, avtor elimizdiń áıgili qaıratkerleri - Názir Tórequlov pen Turar Rysqulovtyń ómiri men qyzmetiniń jarqyn betterin baıandaıdy. Eńbektiń negizgi taqyryptarynyń biri - búgingi Qazaqstannyń Eýropadaǵy qaýipsizdik jáne yntymaqtastyq uıymyna tóraǵalyǵy. Osy oraıda avtor óziniń salmaqty oılaryn ortaǵa salyp, elimizdiń halyqaralyq qatynastar salasyndaǵy ózindik damý jolyna erekshe mán bergen.
«Búgingi tańda elimizdiń joǵary oqý oryndarynda otandyq dıplomatııanyń teorııasy men tájirıbesin oqyp jatqan qazaq jastary kóp. Biraq, ókinishke oraı, Qazaqstannyń dıplomatııalyq qyzmetine arnalǵan memlekettik tildegi oqýlyqtar óte az. Sol sebepti biz qazaq tilinde bilim alyp jatqan stýdentter men magıstranttarǵa termınologııa jaǵynan barynsha túsinikti bolatyn oqýlyqty daıarlaýdy kózdedik. Árıne, qıynshylyqtar bolady. Oǵan qaramastan, bul oqýlyq ázirlenip, Eýrazııa ulttyq ýnıversıtetiniń baspahanasynan jaryq kórdi. Bir ókinishtisi, QR Bilim jáne ǵylym mınıstrligi osy jumysta belsendilik tanytyp jatqan joq», - deıdi avtor S.Batyrshauly.
