Qazaq tilinde habar taratatyn «Shalqar» arnasynyń mártebesin kóterip, qamtý aýmaǵyn arttyrǵan abzal - Z. Alshymbaev
ASTANA. Sáýirdiń 14-i. QazAqparat /Qanat Mámetqazyuly/ -Memlekettik tilde habar taratatyn «Shalqar» arnasynyń mártebesin kóterip, kúshin arttyrǵan abzal. Búgin QR Parlamenti Májilisiniń jalpy otyrysynda QR Baılanys jáne aqparat mınıstrine saýal joldaǵan depýtat Zeınolla Alshynbaev osylaı málim etti,
dep habarlaıdy QazAqparat.
«Shalqar» ulttyq arnasy - memlekettik tilde ǵana habar taratatyn respýblıkadaǵy jalǵyz arna. Bul qyryq jyldan beri halqymyzdyń muńyn muńdap, joǵyn joqtap, ulttyq qundylyqtardy dáriptep kele jatqan, tili men dilin, áni men sazyn, ádet-ǵuryp, salt-sanasy men dástúriniń ozyǵyn nasıhattap kele jatqan arna. «Shalqar» radıosynyń aýyldarǵa taratý múmkindiginiń joqtyǵyna baılanysty qazirgi negizgi baǵyty qazaq halqynyń qalalyq bóligine qyzmet etý bolyp otyr. Atap aıtar bolsaq, árqaısysy qýattylyǵy 1000 kılovattyq FM dıapazondy habar taratqyshtarymen Astana, Almaty qalalary men 14 oblys ortalyqtarynda, birqatar eldi mekenderde ǵana habar taratylady. Arnada búgingi ádebıetimiz ben mádenıetimizdiń maqtanyshy aqyn, jazýshylar, belgili óner adamdarynyń eńbekterine olardyń ulaǵatty ómirlerine erekshe kóńil bólinýde. Sonymen birge alys-jaqyn shetelderdegi qandas baýyrlarymyzdyń búgingi jaıy men erteńine arnalǵan habarlarda ulttyq bolmysymyz, halyq psıhologııasyndaǵy týǵan jerge degen súıispenshilik, shetten elge kelgen aǵaıynǵa kórsetiler kómek jaıy kóterilip keledi. Habarlardyń basty sıpaty halyqty qazaq rýhanııatyna sýsyndatý, jastardyń qazaq eliniń patrıoty bolyp qalyptasýyna atsalysý», dedi Z. Alshymbaev.
Sonymen birge, depýtat 40 jyldan astam ýaqyt boıy jumys istep kele jatqan «Shalqar» radıosynyń habarlaryn kezinde Qazaqstannan tys Reseı, Qytaı, Mońǵolııa, Ózbekstan, Qyrǵyzstan, Aýǵanystan jáne basqa da shet elderde turatyn qandastarymyzdyń tyńdap kelgenin, biraq qazirgi kúni arna habarlary tek óz turǵyndarymyzdyń 61,31 paıyzyn ǵana qamtyp otyrǵanyn aıtty.
«Respýblıkadaǵy qıynshylyqtarǵa bola kezinde jabylǵan «Shalqar» radıosy 2002 jyly qańtardyń 16-synan bastap qaıtadan FM dıpazonynynda efırge shyǵa bastady. Biraq, «Shalqar» arnasy elimizdiń barlyq aýmaǵyn qamtı almaı keledi. Búgingi kúni elimizdiń ekonomıkalyq múmkindikteri artyp kele jatqan tusta «Shalqar» arnasyn burynǵydaı berilýin táýligine 24 saǵatqa jetkizip, Reseıdegi, Qytaıdaǵy, Mońǵolııadaǵy, Ortalyq Azııa aımaǵynda turatyn qandastarymyz da tyńdaı alatyndaı etip qýatyn kúsheıtkenimiz abzal. Bul shara úshin arnanyń ishki shyǵarmashylyq jáne tehnıkalyq múmkindikteri jetkilikti», degen depýtat Baılanys jáne aqparat mınıstrligine birqatar usynystaryn da jetkizdi.
Atap aıtqanda, depýtat respýblıkadaǵy tek qazaq tilinde habar taratatyn jalǵyz «Shalqar» ulttyq arnasynyń memlekettik aqparat quraly retinde mártebesin arttyryp, jeke radıo mártebesin berý qajettigin atap ótti.
